Ժամկետային զինծառայողների ծնողներից կազմված խումբն այսօր վարչապետի հետ երկու ժամից ավելի տեւած արդեն հինգերորդ հանդիպումից հետո իրենց սպասող լրատվամիջոցներին տեղեկություններ փոխանցելու հարցում ժլատ գտնվեցին:
Ծնող Արմինե Ավագյանը ընդամենը բավարարվեց մեկ-երկու կցկտուր նախադասությամբ այն մասին, որ գոհ են, փոխհամաձայնություն կա, բարձրացված բոլոր խնդիրներն ընթացքի մեջ են, անցած հանդիպմանը կար ժամանակի խնդիր, այս անգամ այդ խնդիրը չկա, բոլոր միջնաժամկետ եւ երկարաժամկետ խնդիրներն ունեն լուծման իրենց ժամանակահատվածը: Ու մեկ էլ միմյանց հորդորեցին իրենց ծառայող զավակներին այսօրվա հանդիպման արդյունքների մասին կոնկրետ բաներ չասել:
Կարդացեք նաև
Դրսում գտնվող ծնողների մի մասին այդ կցկտուր հայտարարությունները չբավարարեցին: «Էլի ոչ մի կոնկրետություն: Ժամանակ են ձգում: Մինչեւ սկսեն զբաղվել մեր բարձրացրած հարցերով, երեխաների ծառայության ժամկետն էլ կլրանա»,- տրտնջում էին նրանցից ոմանք:
Աշոտ ՀԱԿՈԲՅԱՆ
