«Մեզ ասում են` ինչի եք ինքնաթիռ գնել։ Այո, մենք ինքնաթիռ ենք գնել, որոնք մայիս են բերվել և այո, չենք հասցրել հրթիռները մինչև պատերազմը ձեռք բերել։ Բա ինքնաթիռները դուք ձեռք բերեիք, որ մենք էլ հասցնեինք հրթիռները ձեռք բերել։ 26 տարվա պետությունը ինչու չուներ կործանիչ ավիացիա»,-մարզային այցի ժամանակ երեկ հայտարարել էր վարչապետ Նիկոլ Փաշինյանը՝ նկատի ունենալով «ՍՈՒ-30» կործանիչները։
Այս համատեքստում որոշ օգտատերերի ուշադրությունից չի վրիպել այն փաստը, որ դեռեւս 2020 թ․-ի հուլիսի 3-ին Նիկոլ Փաշինյանը հետեւյալ «ֆեյսբուքյան» գրառումն էր արել․ «Սու 30»-ները երեկ «մարտական խոցումով» առաջին վարժական թռիչքներն են իրականացրել՝ փորձարկելով երկինք-երկիր հրթիռներ՝ «գրոհային գործողության» համար։ Բոլոր թիրախները խոցվել են բարձր ճշգրտությամբ»։
Ի հայտ է գալիս հարցադրում՝ եթե «ՍՈՒ-30»-ները չեն ունեցել հրթիռներ, ինչպես երեկ վարչապետը փաստեց, ապա ինչպե՞ս էին հուլիսին կործանիչները գործի դրվել վարչապետի նկարագրած սցենարով։
Կարդացեք նաև
Aravot.am-ի հետ զրույցում «Հենակետ» վերլուծական կենտրոնի ղեկավար, Արցախի նախագահի նախկին խորհրդական Տիգրան Աբրահամյանն այս հարցի վերաբերյալ ասաց․ «Հիմնական մանիպուլյացիան հետեւյալն է․ նախ, «ՍՈՒ-30»-ներն ունեն սպեցիֆիկ հրթիռներ, որոնք մենք չենք ունեցել, եւ դա փաստվեց վարչապետի խոսքից, եւ դրա մասին մի քանի զինվորականներ էին խոսել պատերազմական գործողություններից հետո։ Երկրորդ, ես տեղյակ չեմ՝ իրականում խոցում եղե՞լ է, թե ոչ, բայց ասեմ, որ այդ ինքնաթիռների վրա այլ տիպի հրթիռներ էլ են կարողանում տեղակայել եւ խոցում իրականացնել։ Իհարկե, «ՍՈՒ-30»-ների գլխավոր արժեքը, նշանակությունն ու դերակատարումը հենց սպեցիֆիկ հրթիռների մեջ է, որոնք մենք չենք ունեցել։ Չենք ունեցել, բայց այդ մասին չի հայտարարվել, ավելին՝ այդ ինքնաթիռները որպես PR արշավ՝ երկար ժամանակ օգտագործվել են՝ սկսած վարչապետի սելֆիներից, ավարտած տարբեր թռիչքներով։ Սակայն ինչպես պարզ դարձավ պատերազմական օրերին, դրանք իրականում չեն կիրառվել նրա համար, ինչի համար նախատեսված էին»։
Լուիզա ՍՈՒՔԻԱՍՅԱՆ
Մեկ անգամ էլ եմ գրել,որ հակառակորդի դեմ ամենաարդյունավետ զենքը անակնկալն է…:Իսկ մենք նախօրոք տեղեկացրել էինք ՍՈՒ-երի ձեռք բերման մասին,նրանք էլ հակակշիռ Թուրքիայից Ֆ16 էին բերել իրենց հրթիռներով և արեստավարժ օդաչուներով….