«Ձեր նշած անձի համար պատերազմի ընթացքում խրամատը եղել է Գորիսի համայնքապետարանը»,-այսօր այս մասին ասաց Գորիս խոշորացված համայնքի ղեկավար Առուշ Առուշանյանը «Վերածնվող Հայաստան» կուսակցության վարչության անդամների մամուլի ասուլիսում՝ անդրադառնալով «Իմ քայլը» խմբակցության պատգամավոր Արմեն Խաչատրյանի հայտարարությանը։
Հիշեցնենք, Արմեն Խաչատրյանն ասել էր․«Բոլոր համայնքներն ու աշխատակիցներն ակտիվ մասնակցել են պատերազմի ժամանակ թիկունքային աշխատանքներին, ինչպես նաեւ ամբողջ ժողովուրդը, սակայն դա չի նշանակում, որ այնպիսի վիճակում է գտնվել երկիրը, որ համայնքապետերը պետք է ջոկատ կազմեին եւ գնային պայքարեին թշնամու դեմ»։
Պարոն Առուշանյանը շարունակելով, ասաց․ «Եթե նա նկատի ուներ էդ հատվածում պատերազմ չի տեսել, այո, ճիշտ է, մենք համայնքապետարանում չենք եղել պատերազմի ողջ ընթացքում։ Հետո մեկնաբանել է, թե պատերազմի ավարտից հետո․․․ ես դեկտեմբերի 14-15 -ը եղել եմ առաջնագծում, եղել է, որ եկել ենք, հետ մեզ հերթափոխել են»։
Քաջարան համայնքի ղեկավար Մանվել Փարամազյանն էլ հավելեց․ «Ես տեսել եմ պատերազմի ընթացքում, երբ վարչապետն եկավ Գորիս, էն ժամանակ տեսա ու մի երկու անգամ էլ հարցրեցի Առուշանյանից՝ ի՞նչ է անում Խաչատրյանը համայնքապետարանում։ Ընդամենը սուրճ էր խմում, ինքը ինչ գիտի առաջնագծում ինչ է տեղի ունեցել։ Մենք ենք եղել մեր ջոկատներով առաջնագծում՝ այն ահռելի աշխատանքները, պատասխանատվությունը, որ վարչապետը կոչ արեց հոկտեմբերի 17-ին, իսկ մարտերը ընթանում էին դեռ Ջաբրայիլում, իսկ ինքը կոչ արեց՝ հարգելի համայնքապետեր, անցեք Սյունիքի ինքնապաշտպանությանը։ Մենք այն ժամանակ հասկացանք, թե ինչ է կատարվում։ Ո՞նց է հնարավոր, որ մարտերը Ջաբրայիլում ընթանան, իսկ վարչապետը Սյունիքի ինքնապաշտպանության կոչ անի։ Սյունիքի եւ Ջաբրայիլի հեռավորությունը 80-100 կիլոմետր է, ենթադրություն արեք՝ ինչո՞ւ Սյունիքի ինքնապաշտպանություն, այլ ոչ թե Կուբաթլուի, Զանգելանի»։
Կարդացեք նաև
Հիշեցնենք, որ Սյունիքի մի շարք համայնքների ղեկավարներ «Վերածնվող Հայաստան» կուսակացության վարչության անդամ են։
Մանրամասները՝ տեսանյութում
Նելլի ԲԱԲԱՅԱՆ
