«Առաջին հայացքից նույնիսկ անմեղ կամ դրական թվացող փոփոխության խորքում ու հիմքում դրված է քաղաքական իրենց ձգտումներն իրացնելը»,- Դեմիրճյան փողոցում հրավիրված հավաքի ընթացքում լրագրողների հետ զրույցում հայտարարեց ՀՅԴ Գերագույն մարմնի անդամ Արծվիկ Մինասյանը` անդրադառնալով «Իմ քայլը» խմբակցության նախաձեռնությամբ դատական օրենսգրքի փոփոխություններին:
Հիշեցնենք՝ այսօր ԱԺ արտահերթ նիստում քննարկման ներկայացվեց «Դատական օրենսգրքում» փոփոխությունների նախագիծը:
Այս նախաձեռնությունը Արծվիկ Մինասյանը համարում է հակասահմանադրական, հակատրամաբանական և հակաիրավական: Նա վստահեցրեց՝ «Իմ քայլի» պատգամավորները չեն պատկերացնում՝ ինչի մասին է խոսքը, ուստի իրենք եկել են, որ նրանց բացատրեն վտանգները և թե իրենք ինչ պատասխանատվություն են կրելու:
Կարդացեք նաև
Իշխող խմբակցության նախաձեռնության առիթով Արծվիկ Մինասյանը փաստեց՝ նախագիծն 80 «կողմ» է հավաքել առաջին ընթերցմամբ, ուստի հնարավոր համարեց իրականացնել գործողություններ, որ նախագիծը երկրորդ ընթերցմամբ չանցնի: Այս առիթով նա նաև հավելեց. «Անշուշտ, Սահմանադրական դատարանն օրինական հիմքն է ու հնարավորությունը: Այն բացվում է ոչ միայն խորհրդարանական ընդդիմության, այլև նախագահի, ՄԻՊ-ի համար: ԲԴԽ-ն բացասական եզրակացություն է տվել այս նախաձեռնությանը, բայց տեսնում ենք՝ այդ կարծիքը հաշվի առնված չէ, չի էլ բարձրաձայնվում: ՄԻՊ եզրակացությունը չկա այս փաթեթում: Այս իշխանության ուզուրպացիոն քաղաքականությունը շարունակվում է: Այս ամենին վերջ տալու համար ոչ միայն խորհրդարանական, այլև արտախորհրդարանական ընդդիմադիրները պետք է համախմբվեն»:
Լրագրողները հետաքրքրվեցին՝ Արծվիկ Մինասյա՞նն էլ է կարծում, որ սա արվում է մարտի 1-ի գործի համար, նա պատասխանեց. «Անշուշտ: Այդ գործիքը, որը ժամանակին առաջարկվել է, առաջարկվել է մեր առաջատար իրավաբանների կողմից 2012-ին: Այնտեղ համակարգային լուծում է տրված եղել: Իրավակիրառ պրակտիկայում օրենքի այդպիսի սահմանումը պիտի ունենա հստակ չափորոշիչներ: Նույն այդ գործիքի շրջանակում քաղաքական իշխանությունը իրավունքը չարաշահում է՝ առանց այն համակարգի մեջ դիտելու»:
Տաթև ՀԱՐՈՒԹՅՈՒՆՅԱՆ
