«Հանգուցալուծումը տեղի ունեցավ, եւ պետք է գնանք արժանապատիվ ընտրությունների։ Ժողովուրդը նոր իշխանություն ընտրելու հնարավորություն ունի»,- խորհրդարանում լրագրողների հետ ճեպազրույցում այսօր անդրադառնալով հունիսի քսանին սպասվող արտահերթ խորհրդարանական ընտրություններին՝ ասաց «Բարգավաճ Հայաստան» խմբակցության պատգամավոր Միքայել Մելքումյանը։
Մեկնաբանելով տեղեկությունները, թե ընտրությունների օրը հայտարարելուց առաջ տեղի ունեցած՝ Նիկոլ Փաշինյան-Գագիկ Ծառուկյան հանդիպման մասին Ծառուկյանի կուսակիցները նախապես չեն իմացել, Մելքումյանը նշեց․ «Իհարկե, տեղյակ ենք եղել, որ հանդիպելու է։ Մենք միշտ շփվում ենք խոհրդակցությունների ձեւաչափով, այնպես որ՝ հանգիստ եղեք»։
Լրագրողները հետաքրքրվեցին՝ եթե ԲՀԿ-ն «Հայրենիքի փրկության շարժմանն» էր միացել, ընտրել փողոցային պայքարը եւ վարչապետի հրաժարականն էր պահանջում, ինչո՞ւ համաձայնեց ընտրությունների նշանակմանը։ «ԲՀԿ-ն որեւէ բանից հետ չի կանգնել։ Նպատակը եղել է վարչապետի հրաժարականը, եւ հրաժարականը կլինի մինչեւ հունիսի քսանը»։
Կարդացեք նաև
Նկատառմանն ի պատասխան, որ «Հայրենիքի փրկության շարժումը» Վազգեն Մանուկյանին էր տեսնում ժամանակավոր կառավարության վարչապետի պաշտոնում, Մելքումյանը շեշտեց․ «Շատ գործոններ են դեր խաղացել։ Շարժումն էլ է դեր խաղացել։ Ընտրություններին կնախորդի վարչապետի հրաժարականը։ Եթե լինեն ակցիաներ, այնպես չի, որ ԲՀԿ-ն չի մասնակցելու»։
Լուիզա ՍՈՒՔԻԱՍՅԱՆ
