ՀՀ երրորդ նախագահ Սերժ Սարգսյանի գործով հերթական դատական նիստում այսօր մեղադրյալներից գյուղատնտեսության նախկին նախարար Սերգո Կարապետյանի եւ գյուղատնտեսության նախկին փոխնախարար Սամվել Գալստյանի պաշտպանները դատարանին միջնորդեցին նրանց նկատմամբ քրեական հետապնդումը դադարեցնել՝ վերջիններիս մահվան հանգամանքով պայմանավորված։ Հիշեցնենք, որ Կարապետյանը եւ Գալստյանը մահացել են կորոնավիրուսի հետեւանքով առաջացած բարդությունների պատճառով։
Դատարանը, վերադառնալով խորհրդակցական սենյակից, միջնորդությունը բավարարեց։ Ապա Սերժ Սարգսյանի շահերի պաշտպանները ներկայացրին Սարգսյանի գույքի վրա նախաքննական մարմնի կողմից դրված կալանքը վերացնելու մասին միջնորդություն։ Նրանք հիշեցրին, որ քննիչի որոշմամբ կալանք է դրվել Սերժ Սարգսյանի՝ ավելի քան 489 միլիոն դրամի չափով շարժական եւ անշարժ գույքի, ֆինանսական միջոցների վրա։ Ընդ որում, նրանց մեջբերմամբ, պատճառաբանվել է, թե Սերժ Սարգսյանը նախկինում զբաղեցրել է բարձր պաշտոններ, ունի կենսափորձ եւ կապեր, ինչը հիմք է տալիս ենթադրելու, որ նա կարող է թաքցնել, օտարել կամ սպառել սեփականության իրավունքով իրեն պատկանող գույքը։
Պաշտպանների խոսքով՝ Սերժ Սարգսյանի գույքի եւ հաշիվների վրա կալանք դնելու մասին քննիչի որոշումը հիմնավորված եւ պատճառաբանված չէ, եւ այդպիսով ոտնահարվել են սեփականությունը տնօրինելու կոնվենցիոն եւ սահմանադրական երաշխիքները։ Միջնորդության որոշումը դատարանը կհրապարակի վաղը, իսկ հաջորդ դատական նիստը նշանակվեց ապրիլի 15-ին։
Հիշեցնենք՝ մեկ տարի առաջ դեկտեմբերի 4-ին ՀՔԾ-ն հայտարարեց, որ իրենց վարույթում քննվող դիզվառելիքի վերաբերյալ քրեական գործի նախաքննության ընթացքում ձեռք բերված բավարար ապացույցների համակցության հիման վրա Սերժ Սարգսյանին մեղադրանք է առաջադրվել վատնման եղանակով առանձնապես խոշոր չափի՝ մոտ կես միլիարդ ՀՀ դրամի հափշտակություն կազմակերպելու համար: Նրա նկատմամբ որպես խափանման միջոց է ընտրվել չհեռանալու մասին ստորագրություն։
Լուիզա ՍՈՒՔԻԱՍՅԱՆ
