«Ժողովուրդը պետք է ընտրի պետականամետ կառավարություն, որն օր առաջ պետք է լծվի ՀՀ անվտանգության եւ քաղաքացիների բարեկեցության մակարդակների բարձրացման գործին։ Այլընտրանք չկա»,-Երեւանի ընդհանուր իրավասության դատարանի դիմաց այսօր իր գործով դատական նիստի մեկնարկին հայտարարեց ՀՀ երրորդ նախագահ, Հայաստանի հանրապետական կուսակցության նախագահ Սերժ Սարգսյանը։
«Այս երեք տարիներին մենք նաեւ կուսակցական կորուստներ ունեցանք, բայց եւ կոփվեցինք։ Մեր շարքերը բյուրեղացան, եւ մենք այսօր եւս ունենք պրոֆեսիոնալ եւ մրցունակ թիմ, ու պայքարելու ենք մեր ազգային պետության համար»,-նշեց նա։
Սերժ Սարգսյանը շեշտեց․ «Ես քաղաքական խրամատը չեմ լքելու, ես խրամատ լքող չեմ, եւ իմ կյանքում ապացուցել եմ՝ կարող եմ հեշտությամբ պաշտոն զիջել, կարող եմ հանուն ՀՀ ժողովրդի՝ զիջել մի ողջ իշխանություն, բայց ես երբեք չեմ լքի խրամատը, որը պաշտպանում է հայկական պետականությունը։ Սրանում կարող եք վստահ լինել։ ՀՀԿ-ի ձայնը եղել է հնչեղ եւ այդպես էլ մնալու է։ Մեր գործողությունները լինելու են հստակ, հաշվարկված, համակարգված եւ ազնիվ»։
Կարդացեք նաև
Լրագրողները հետաքրքրվեցին հնարավոր արտահերթ ընտրությունների մասին, սակայն Սերժ Սարգսյանը դժվարացավ պատասխանել՝ ասելով, որ իշխանության քայլերը դժվար է կանխատեսել․ «Երբ կլինի ընտրությունների նշանակման մասին որոշում, այդ ժամանակ մեր կարծիքը կասենք»։
Լուիզա ՍՈՒՔԻԱՍՅԱՆ
