Կոտայքի մարզի Զովունի բնակավայրում նոր թաղամաս կկառուցվի։ Այսօր կառավարության նիստում հաստատվեց որոշման նախագիծ, ըստ որի՝ կառուցապատում իրականացնող «Մագնոլիա-Կոմֆորտ» ՍՊԸ-ին թույլատրվեց Եղվարդ համայնքի Զովունի բնակավայրում բնակելի թաղամաս կառուցելու համար համայնքի հողամասն ուղղակի վաճառքի ձեւով օտարել։
Տարածքային կառավարման եւ ենթակառուցվածքների նախարար Սուրեն Պապիկյանի ներկայացմամբ՝ ընկերությունը նախատեսում է համայնքից ուղղակի վաճառքի ձեւով կադաստրային արժեքով ձեռք բերել Զովունի գյուղի 3.3 հեկտար մակերեսով հողամաս՝ 150 միլիոն 531 հազար դրամով, որը մոտ է շուկայական արժեքին։
Ընկերությունը նախատեսում է նշված տարածքում կառուցել բնակելի թաղամաս՝ 18 բնակելի եւ 1 հասարակական շենք, իսկ ընդհանուր տարածքի 40%-ը պետք է կանաչապատվի։ Պարոն Պապիկյանի խոսքով՝ ներդրումային այս ծրագրի արժեքը կազմում է 18 միլիարդ 898 միլիոն դրամ, թաղամասի կառուցապատումը մեկնարկելու է շինթույլտվություն ստանալուց հետո մեկ ամսվա ընթացքում, թաղամասը շահագործման կհանձնվի հինգ տարվա ընթացքում։
«Բացի այս, ընկերությունը պարտավորվում է հողամասի առուվաճառքի պայմանագիր կնքելուց հետո Զովունիում իրականացնել դպրոցի, մանկապարտեզի կամ խաղահրապարակի սահմանված կարգով փորձաքննություն անցած նախագծանախահաշվային արժեքով մոտ 50 միլիոն դրամի շինարարական եւ հիմնանորոգման աշխատանքներ։ Բավականին հաջող ծրագիր է, կարող է նոր շունչ հաղորդել Զովունի համայնքին»,-ասաց նախարարը։
Կարդացեք նաև
Նելլի ԲԱԲԱՅԱՆ
