ԱԺ առողջապահության եւ սոցիալական հարցերի մշտական հանձնաժողովը մարտի 17-ի հերթական նիստում քննարկեց ՀՀ Կառավարության եւ ԱԺ «Իմ քայլը» խմբակցության մի խումբ պատգամավորների հեղինակած «Հաշմանդամություն ունեցող անձանց իրավունքների մասին» եւ երեք այլ օրենքների նախագծերի փաթեթը:
ՀՀ աշխատանքի եւ սոցիալական հարցերի նախարար Մեսրոպ Առաքելյանն անհրաժեշտ համարեց փաթեթի ընդունումը՝ հիմնավորելով, որ 1993 թվականին ընդունված գործող օրենքն այլեւս ժամանակավրեպ է եւ չի համապատասխանում հաշմանդամություն ունեցող անձանց կարիքներին: Նախարարի խոսքով՝ նախագծերն անհրաժեշտ իրավական հիմքեր կստեղծեն հաշմանդամություն ունեցող անձանց իրավունքների պաշտպանության, հավասար հնարավորությունների եւ մատչելի պայմանների ապահովման, hասարակական կյանքի բոլոր ոլորտներում նրանց իրավունքների իրացումն ապահովելու համար` բացառելով հաշմանդամության հիմքով խտրականությունը: Մասնավորապես, հաշմանդամության խմբերի փոխարեն նախատեսվում է սահմանել անձի ֆունկցիոնալության սահմանափակման աստիճան` թեթեւ, միջին, ծանր եւ խորը: Հաշմանդամության գնահատումը կկատարվի՝ հիմնվելով Առողջապահության համաշխարհային կազմակերպության ֆունկցիաների միջազգային դասակարգման գաղափարախոսության եւ մոտեցումների վրա: Աշխատանքի եւ սոցիալական հարցերի, Առողջապահության ու Կրթության, գիտության, մշակույթի եւ սպորտի նախարարությունները, հասարակական կազմակերպությունները ՄԱԿ-ի եւ ԵՄ-ի աջակցությամբ մշակել են գնահատման գործիքները, մեթոդական ուղեցույցերը, անձի ֆունկցիոնալության գնահատմանն առնչվող բիզնես գործընթացները: Մի քանի փուլով իրականացվել են փորձարկումներ: Մշակվել եւ Կառավարությանն է ներկայացվել հաշմանդամության գնահատման համակարգի բարեփոխումների եւ անձի ֆունկցիոնալության գնահատման համակարգի ներդրման ծրագիրը:
Եթե ընդունվի օրենսդրական փաթեթը, անձանց ֆունկցիոնալության գնահատումը կգործարկվի 2022-ի սեպտեմբերից:
Հանձնաժողովի նախագահ Նարեկ Զեյնալյանը (լուսանկարում) դրական գնահատեց փաթեթը՝ ընդգծելով, որ այն գրեթե բացառելու է հաշմանդամության կարգ տալու գործում առկա կոռուպցիոն երեւույթները, քանի որ գնահատող հանձնաժողովը ձեւավորվելու է անձի ֆունկցիոնալությունը գնահատող փորձաքննության նախորդ օրը: Նարեկ Զեյնալյանը հատկապես կարեւորեց այն հանգամանքը, որ անձի ֆունկցիոնալությունը գնահատելու համար ձեւավորվելիք ռեեստրում ընդգրկված մասնագետներն ընտրվելու են էլեկտրոնային բանկից՝ պատահականության սկզբունքով:
Կարդացեք նաև
Փաթեթը հանձնաժողովի դրական եզրակացությամբ կառաջարկվի ընդգրկելու ԱԺ յոթերորդ գումարման վեցերորդ նստաշրջանի օրակարգի նախագծում:
