Ներկայումս մշակման փուլում է ձկնորսության մի համակարգը, որի հիմնական գաղափարն այն է, որ ձկնորսները ստանան աշխատավարձ, այլ ոչ թե այդ ձուկը վաճառեն: Վաճառողը պետք է լինի պետությունը: Այսօր այս մասին «Տեսակետ» ակումբում ասաց ՀՀ ԳԱԱ Կենդանաբանության եւ հիդրոէկոլոգիայի գիտական կենտրոնի տնօրեն, կենսաբանական գիտ. դոկտոր, պրոֆեսոր Բարդուխ Գաբրիելյանը:
Բարդուխ Գաբրիելյան
Նրա խոսքով, նպատակն այն է, որ ձկնորսն ինքը պաշտպանի ձկան պաշարները, որպեսզի վաղն էլ որս ունենա: Խոսքը մասնավորապես Սեւանա լճից ձկան որս կատարելու մասին է: Բարդուխ Գաբրիելյանի խոսքով, խորհրդային ժամանակներում պետական որսի ձկնորսը չէր թողնում, որ մի որսագող իր տարածքում ձուկ բռներ, ինքն անձամբ պաշտպանում էր այդ տարածքը: Նա Սեւանի ճահճացման հիմնական պատճառներից մեկը համարեց անկարգ, անկանոն որսը:
«Աշխարհում արգելված է կատարել որս այն կենդանիների, որոնք գոնե մեկ անգամ սերունդ չեն տվել, ընդ որում, մեզ մոտ մանրաձուկն ավելի շատ են որսում, քան հասուն ձկները: Ձկնային պաշարները նույնպես պետք է կառավարելի դարձնել»,-ասաց պարոն Գաբրիելյանը:
Նա գտնում է, որ որսագողության դեմ ուժային մեթոդներով պայքարն անարդյունավետ է, այդ հարցին համալիր լուծում է պետք. «Նախ՝ պետք է այդ շրջանի սոցիալ-տնտեսական հարցը լուծել: Երկրորդ՝ պետք է փոխել ձկնորսության համակարգը»,-ասաց մասնագետը:
Կարդացեք նաև
Սեւանի ճահճացման մեկ այլ կարեւոր պատճառ մասնագետը նշեց լճում ջերմաստիճանի եւ օրգանական նյութերի ավելացումը, որը պայմանավորված է ջրահավաք ավազաններից եկող ջրով, քանի որ այնտեղ չկան մաքրման կայաններ: Ըստ նրա, այն կենդանիները եւ բույսերը, որոնք մահանում են եւ իջնում են ջրի հատակը, հաջորդ տարիների ընթացքում դրանք մտնում են ներջրամբարային գործընթացների մեջ, քայքայվում են, ինչը բերում է լճի աղտոտման, թթվածնի պակասի եւ կապտականաչ թունավոր ջրիմուռների համար նպաստավոր պայմաններ է ստեղծվում:
«Կլիմայի գլոբալ տաքացման պայմաններում չենք կարող այդ գործընթացը կանգնեցնել, բայց դրա ազդեցությունը նվազեցնել կարող ենք: Պետք է բարձրացնենք Սեւանա լճի ջրի մակարդակը, այդ պարագայում կենսածին տարրերը կլուծվեն եւ կոնցենտրացիան ավելի քիչ կլինի: Պետք է նվազեցնել այդ օրգանական նյութերի մուտքը ջրահավաք ավազան»,-ասաց Բարդուխ Գաբրիելյանը՝ նշելով, որ մեծ քաղաքներում Գավառում, Մարտունիում պետք է կառուցվեն մաքրման կայաններ, որոնք մեխանիկական մաքրումից բացի պետք է կատարեն նաեւ քիմիական տարրերի մաքրում:
Լուսինե ԲՈՒԴԱՂՅԱՆ
