Ի թիվս այլոց ԱԺԲ հանրահավաքին ելույթ ունեցավ նաեւ ԱԺԲ խորհրդի անդամ Վարուժան Ավետիսյանը: Նրա խոսքով, 44-օրյա պատերազմը բացահայտեց մեր իրական վիճակը. «Մենք տեսանք, որ 30 տարի խաբել ենք ինքներս մեզ, տեսանք, որ չունենք լիարժեք պետություն, չունենք ժամանակակից տնտեսություն եւ բանակ: Կանգնած ենք լինել-չլինելու խնդրի առջեւ»:
Վարուժան Ավետիսյանի խոսքով, այդ խնդիրը լուծելու երկու տարբերակ ունենք. «Առաջին. մնալ ռուս-թուրքական փակուղու մեջ, կարճ ժամանակ հետո կորցնել նաեւ պետականության, տնտեսության ու բանակի մնացորդները եւ վերանալ:
Երկրորդ, դուրս գալ ռուս-թուրքական փակուղուց, ձեռք բերել գոյատեւման եւ զարգացման հնարավորություններ: Առաջին տարբերակն ընտրություն չէ, մահը չեն ընտրում: Երկրորդ տարբերակը դժվար է, վտանգավոր, պահանջում է ազգային համախմբում, քրտինք ու ջանք: Բայց դա միակ տարբերակն է, եւ մենք ընտրում ենք այդ միակ տարբերակը»:
Վարուժան Ավետիսյանի խոսքով, ռուս-թուրքական փակուղուց դուրս գալու եւ դրանից եկող մարտահրավերները չեզոքացնելու, տնտեսական, տեխնոլոգիական զարգացում ապահովելու համար անհրաժեշտ է Ռուսաստանին եւ Թուրքիային գերազանցող ուժ եւ կարողություն: «Ցավոք, ներկայումս նման ուժ եւ կարողություն առայժմ չունենք, ուստի պետք է ձեռք բերենք այնպիսի դաշնակից, որն ի զորու կլինի աշխարհագրորեն Ռուսաստանի եւ Թուրքիայի միջեւ գտնվող մեր երկրի համար երաշխավորել անվտանգություն եւ զարգացում:
Կարդացեք նաև
Այդ առումով դարձյալ ունենք երկու տարբերակ. ՆԱՏՕ եւ ԱՄՆ: ՆԱՏՕ անդամ դառնալու համար անհրաժեշտ է չունենալ տարածքային վեճեր կամ հավակնություններ, ինչպես նաեւ հարկավոր է համապատասխանել նրա ստանդարտներին: Այս երկու պայմանն էլ ժամանակի առումով մեզ համար չեն, քանի որ ունենք չլուծված հայկական հարց եւ պետության տարածքային ամբողջականությունը վերականգնելու հրամայական: ՆԱՏՕ-ի չափանիշներին համապատասխանելու համար չունենք նաեւ տնտեսական եւ տեխնոլոգիական կարողություններ:
Դարձյալ մնում է մեկ տարբերակ. առանց ՆԱՏՕ անդամակցության ԱՄՆ-ի հետ երկկողմ ռազմավարական դաշինք: ԱՄՆ օրենսդրությամբ այդպիսի դաշինքը սահմանված է հատուկ կարգավիճակով` ԱՄՆ-ի ոչ ՆԱՏՕ անդամ հիմնական դաշնակից, եւ չի պարունակում նման դաշնակցին ներկայացվող որեւէ պահանջ: Մեր ընդդիմախոսները մեզ հարցնում են` իսկ մենք պե՞տք ենք արդյոք ԱՄՆ-ին, նա ուզո՞ւմ է, որ մենք դառնանք իր դաշնակիցը:
Մենք ասում ենք` նույնիսկ եթե այդ հարցի պատասխանը պարզ չէ, ուրիշ տարբերակ չունենք, ամեն կերպ պետք է հասնենք մեր նպատակին»,-համոզված է Վարուժան Ավետիսյանը:
Գոհար ՀԱԿՈԲՅԱՆ
