«Եթե նախկինում, մեր գնահատականներով, տնտեսական աճը 2021 թ-ի ընթացքում պետք է լիներ 2 տոկոս, ապա այժմ այն կկազմի 1.4 տոկոս»,- այսօր Կենտրոնական բանկում հրավիրած ասուլիսում ասաց ՀՀ Կենտրոնական բանկի ղեկավար Մարտին Գալստյանը՝ նշելով, որ արդյունաբերության, ծառայությունների եւ գյուղատնտեսության ոլորտներում թուլացում է արձանագրվել, ինչն էլ պատճառ է դարձել կանխատեսումների վերանայման: Ըստ նրա, խնդիրը հիմնականում ծագել է 2020-ի 4-րդ եռամսյակի ընթացքում եւ այս տարվա առաջին եռամսյակում:
Հիշեցնենք, 2020թ-ի սեպտեմբերին Մարտին Գալստյանը նշել էր, որ համաձայն Կենտրոնական բանկի կանխատեսումների՝ 2021 թվականին Հայաստանը կունենա 4-5 տոկոս տնտեսական աճ:
Մարտին Գալստյանը նաեւ հայտնեց, որ այսօր Կենտրոնական բանկի խորհուրդը նիստ է անցկացրել եւ որոշել վերաֆինանսավորման տոկոսադրույքը թողնել անփոփոխ՝ սահմանելով 5,5 տոկոս:
«2021 թվականի առաջին եռամսյակի ընթացքում հիմնական գործընկեր երկրներում շարունակվում են տնտեսական ակտիվության եւ պահանջարկի միտումները, ինչը ենթադրվում է, որ կպահպանվի միջնաժամկետ հորիզոնում՝ հիմնականում պայմանավորված այդ երկրներում խթանող դրամավարկային եւ հարկաբյուջետային քաղաքականությունների իրականացմամբ»,-ասաց Մարտին Գալստյանը:
Կարդացեք նաև
Ըստ նրա, համաշխարհային պահանջարկի վերականգնման դրական սպասումների ազդեցությամբ, ինչպես նաև մի շարք առաջարկի գործոններով պայմանավորված, հումքային եւ պարենային ապրանքների միջազգային շուկաներում դրսեւորվել են գների աճի միտումներ, ինչը նպաստում է գործընկեր երկրներում սպասվածից բարձր գնաճային միջավայրի ձեւավորմանը. «Նման իրավիճակում Կենտրոնական բանկի խորհուրդը արտաքին հատվածից ՀՀ տնտեսության վրա դեռեւս շարունակում է ակնկալել գնաճային ազդեցություն»:
Լուսինե ԲՈՒԴԱՂՅԱՆ
