ԱԺ պաշտպանության եւ անվտանգության հարցերի հանձնաժողովի նիստում ՀՀ կառավարության ծրագրի՝ 2020թ․-ի կատարման ընթացքի եւ արդյունքների մասին զեկույցի ներկայացման ժամանակ այսօր ՀՀ արտակարգ իրավիճակների նախարար Անդրանիկ Փիլոյանից «Իմ քայլի» որոշ պատգամավորներ հետաքրքրվեցին ապաստարանների վիճակի մասին։
«Իմ քայլից» Արմեն Խաչատրյանը նկատեց՝ ապաստարանների մի մասը որոշ եղանակներով սեփականաշնորհվել են, ինչն իրականում արգելված է իրավական ակտերով։ «Որպես օրինակ գիտեմ, որ «Նաիրիտ 2»-ի տարածքում շատ մեծ ապաստարան կա, բայց մեկ օրում սեփականաշնորհվել է անհասկանալի պայմաններում»,-հայտարարեց Արմեն Խաչատրյանը։
Հանձնաժողովի նախագահ, «Իմ քայլի» պատգամավոր Անդրանիկ Քոչարյանը նկատեց․ «Եթե այդքանը գիտեք, անունն էլ ասեք»։ Արմեն Խաչատրյանը պատասխանեց․ «Նախկին պատգամավոր Հակոբ Հակոբյանի սեփականության տակ է տարածքը։ Իրավական գործընթաց եղել է, որն ինչ-որ տեղ կանգ է առել»։
Կարդացեք նաև
Անդրանիկ Քոչարյանը սա «ոտից գլուխ կոռուպցիա» որակեց։ Իսկ նախարար Անդրանիկ Փիլոյանը, ճիշտ է, այս փաստին որակում չտվեց, սակայն ասաց, որ աշխատում են ապաստարանների վիճակի բարելավման ուղղությամբ։ Նա նաեւ հայտնեց, որ քաղաքացիական պաշտպանության հենակետ կա Շուռնուխ համայնքում, առաջիկայում կհիմնվեն սահմանամերձ մի շարք այլ համայնքներում եւս։
«Իմ քայլի» պատգամավոր Արեն Մկրտչյանն առաջարկեց բնակիչների կողմից սեփականաշնորհված նկուղային տարածքների, որոնք որպես ապաստարան են ծառայում, փակ դռները կոտրել։ Նախարար Փիլոյանն արձագանքեց, որ դուռ կոտրելը հարցի լուծում չէ, քաղաքացին կարող է դատական հայց ներկայացնել, ուստի այս պահին իրազեկման ու քաղաքացիական պաշտպանության վարժանքներ են իրականացնում։
Լուիզա ՍՈՒՔԻԱՍՅԱՆ
