«Ի պատասխան Ձեր կողմից 2021 թվականի մարտի 10-ին ՀՀ ազգային անվտանգության ծառայության տնօրենին հասցեագրված հարցման՝ հայտնում ենք, որ ՀՀ-ում Յունիսեֆի նախկին ներկայացուցիչ ՝ Մարիան Քլարկ–Հաթինգի կողմից Ադրբեջանի եւ Մեծ Բրիտանիայի օգտին լրտեսություն անելու վերաբերյալ ՀՀ ԱԱԾ-ում առկա չեն»,- Aravot.am-ի գրավոր հարցմանն ի պատասխան այսօր հայտնեցին ՀՀ ազգային անվտանգության ծառայության մամուլի կենտրոնից:
Մարտի 10-ին Aravot.am-ը հարցում էր ուղարկել ՀՀ Ազգային անվտանգության ծառայության տնօրեն Արմեն Աբազյանին՝ հետաքրքրվելով արդյոք համապատասխանո՞ւմ են իրականությանը մամուլում շրջանառվող այն լուրերը, որ ՅՈՒՆԻՍԵՖ-ի հայաստանյան գրասենյակի ղեկավարը՝ Մարիան Քլարկ–Հաթինգը լրտեսություն է արել հօգուտ Ադրբեջանի եւ Մեծ Բրիտանիայի:
Հիշեցնենք, որ մարտի 10-ին հայաստանյան լրատվամիջոցներով տեղեկություն շրջանառվեց, որ ՅՈՒՆԻՍԵՖ-ի հայաստանյան գրասենյակի ղեկավարը՝ Մարիան Քլարկ–Հաթինգը լրտեսություն է արել հօգուտ Ադրբեջանի եւ Մեծ Բրիտանիայի, ինչի հետեւանքով էլ ՀՀ կառավարությունը որոշում է կայացրել դադարեցնել նրա գործունեությունը մեր երկրում՝ որպես ՅՈՒՆԻՍԵՖ-ի ներկայացուցչի: Լուրը սակայն, Aravot.am-ի բանավոր հարցմանն ի պատասխան, որեւէ կերպ չմեկնաբանեցին ՀՀ Ազգային անվտանգության ծառայությունից՝ հղում անելով ԱԳՆ մամուլի խոսնակ Աննա Նաղդալյանի արդեն տված պարզաբանմանը՝ նշելով, որ ավելացնելու ոչինչ չունեն:
Լուսինե ԲՈՒԴԱՂՅԱՆ
