Այսօր լրանում է 1921թ. մարտի 16-ի Մոսկվայի պայմանագրի ստորագրման 100-ամյակը: 100 տարի առաջ այս օրը հայ ժողովրդի հանդեպ տեղի ունեցած պատմական ահասարսուռ անարդարության հետևանքով՝ ռուս-թուրքական դավադրությամբ և միջազգային դավադիր լռությամբ, հայ ժողովուրդը զրկվեց իր պատմական բնօրրանի մեծ մասից: Ռուս-թուքական հանցավոր համագործակցությունը բզկտեց հայ ժողովրդի պատմական հայրենիքը:
Մոսկվայի պայմանագիրը, որը ստորագրվել և իրականացվել է առանց հայկական կողմի ներկայացուցիչների մասնակցության, հայ ժողովրդի նկատմամբ իրականացրած անարդար, ստորացուցիչ, դաժան գործարքներից է:
«Բարեկամության և եղբայրության պայմանագրի» կողմերը՝ քեմալական Թուրքիան և բոլշևիկյան Ռուսաստանը, օգտվելով հայ ժողովրդի ծանր կացությունից, հանցակցությամբ մասնատեցին և տիրեցին հայ ժողովրդի պատմական հայրենիքին՝ նրան թողնելով այդ հայրենիքի 1/10-րդ մասը:
1921թ. Մոսկվայի, ապա՝ Կարսի պայմանագրերով ռուսական կողմը Թուրքիային զիջեց Կարսը և Սուրմալուն, իսկ Նախիջևանը հանձնվեց Ադրբեջանին: Հայաստանի Հանրապետությունը խորհրդայնացվեց:
Կարդացեք նաև
Պատմական երկու իրողությունները՝ Թուրքիայում Քեմալականների Ազգային Մեծ ժողովի ձևավորումը և 1917թ. բոլշևիկյան հեղափոխությունը, կործանարար հետևանքներ ունեցան Հայաստանի տարածքների և սահմանների համար:
«Քաղաքական լիգան», վերահաստատելով մեկ տարի առաջ՝ 2020թ. մարտ 16-ի իր հայտարարությունը, գնահատելով ռուս-թուրքական այդ դավադիր գործարքի պատմաքաղաքական նպատակներն ու հետևանքները և ելնելով պատմական անհերքելի փաստերից, այսօր՝ Մոսկվայի պայմանագրի ստորագրումից 100 տարի անց,
Հայտարարում է՝
– Ստորագրող կողմերն այդ քայլով շարունակեցին հայերի ցեղասպանության քաղաքականությունը՝ հայ ժողովրդից խլելով նրա պատմական հայրենիքի կենսական տարածքները:
– Փաստաթուղթը հանցավոր ակտ է մարդկության դեմ. դրա գործողությամբ կողմերը յուրացրեցին հայ էթնոսի բնօրրանի լայն հատվածներ:
– Պայմանագիրը հանցավոր փաստաթուղթ է հայ ժողովրդի նկատմամբ, այն վաղեմության ժամկետ չունի և պարտադիր ենթակա է դատապարտման և առ ոչինչ ճանաչելու:
100 տարի անց հայ ժողովրդի նկատմամբ իրականացվող ցեղասպանության քաղաքականությունը շարունակվեց նաև 2020թ. սեպտեմբեր-նոյեմբերի արցախյան պատերազմի ընթացքում և դրա ավարտով: Հայ քաղաքական ղեկավարների հանցավոր կարճատեսության և կարճամտության պատճառով արցախյան վերջին պատերազմի ընթացքում և դրա ավարտից հետո ռուս-թուրքական դավադրությունը, միջազգային հանրության՝ դատապարտելի անհաղորդությամբ, հայ ժողովրդին զրկեց արյամբ վերանվաճված պատմական Արցախի տարածքների մեծ մասից և այժմ այդ սպառնալիք է դարձել Հայաստանի Հանրապետության ներկա սահմանների համար: Ռուս-թուրքական դավադրությունը 100 տարի հետո նույն ծանրագույն հետևանքներն ունեցավ Հայաստանի և հայ ժողովրդի համար: Հայաստանի տարածքային ամբողջականությունը, ազգային անվտանգությունը և ֆիզիկական գոյությունը վտանգված են:
ՀՀ քաղաքական ղեկավարությունն անընդունակ գտնվեց հասկանալու աշխարհաքաղաքական վտանգավոր փոփոխությունները, դրանց աղետալի հնարավոր հետևանքները և ռուս-թուրքական դավադրության կրկնություն հեռանկարը:
Մենք՝ հայ ժողովրդի զավակներս, Հայաստանում և ի սփյուռս աշխարհի, մեր նախնիների ժառանգներն ենք և մեր պատմական հայրենիքի տարածքների իրավահաջորդները: Մենք պետք է ազգովին մերժենք հայ ժողովրդին պարտադրված հայ-թուրքական ստորացուցիչ սահմանները:
Մոսկվայի պայմանագրի 100-ամյակի այս ծանր օրը՝ «Քաղաքական լիգան», դիմելով հայ ժողովրդին՝ Հայաստանում և Սփյուռքում, կոչ է անում միավորվել՝ մերժելու մեր կենսական շահերը ոտնահարած, մեր օրրանից մեզ օտարած 1921թ. մարտի 16-ի ռուս-թուրքական հակահայ պայմանագիրը և 2020թ. նոյեմբերի 9-ի հայտարարությունը:
«Քաղաքական լիգան» կոչ է անում՝
– ՀՀ խորհրդարանին՝ գումարել խորհրդարանական լսումներ և ԱԺ հատուկ նիստ՝ պայմանագրի դատապարտման և այն առ ոչինչ համարելու պահանջը ներառող օրակարգով:
– Իրականացնել համահայկական բողոքի գործողություններ՝ կասեցնելու մարտի 16-ի պայմանագրի գործունեությունը՝ «Ո՛չ 1921թ. Մոսկվայի պայմանագրին» նշանաբանով:
«Քաղաքական լիգան» ընդգծում է՝
– Եթե Հայաստանն ու հայ ժողովուրդը Մոսկվայի և Կարսի պայմանագրերի խնդիրն իր քաղաքական օրակարգում չընդգրկի, ապա համաձայնված կլինի հայ ժողովրդի վզին փաթաթած ստորացուցիչ սահմանների հետ, ինչն անընդունելի է յուրաքանչյուր հայի համար, քանի որ այն հայկական գործոնի վերացմանն ուղղված ռուս-թուրքական և միջազգային դավադրության շարունակությունն է:
Մեր ներքին տարաձայնությունները չեն կարող այնքան ուժեղ լինել, որ հաղթեն մեր հավաքական, միավորյալ ներուժին՝ չեղարկելու այդ խայտառակ պատմական պայմանագիրը:
«Քաղաքական լիգան» այս հայտարարությամբ շարունակում է ուղիղ մեկ տարի առաջ իր նախաձեռնած առցանց ստորագրահավաքն ընդդեմ 1921թ. մարտի 16-ի Մոսկվայի պայմանագրի՝ կոչ անելով մինչև Կարսի պայմանագրի 100-ամյակը՝ 2021թ. հոկտեմբերի 13-ը, հասնել ռուս-թուրքական ամոթալի գործարքի դատապարտմանը և այդ պայմանագրերն առ ոչինչ ճանաչելուն:
Քաղաքական լիգա
