Պետական վերահսկողական ծառայության նախկին պետ Դավիթ Սանասարյանն, անդրադառնալով գերիներին վերադարձնելու տարբեր գործիչների հայտարարություններին, այսօր Երեւանի ընդհանուր իրավասության դատարանի Շենգավիթի նստավայրում, որտեղ ընթանում է նրա գործով դատական նիստը, ասաց. «Այն հավաստիացումները, որ մարդիկ օր առաջ ուզում են լուծում տալ գերիների հարցին, ես դրանց չեմ հավատում, որովհետեւ, եթե այդպես լիներ, դրան կհաջորդեին այլ գործողություններ»:
Դավիթ Սանասարյանի խոսքով, պետությունն իր գործը չի կարողանում անի. «Մենք խնդիր ունենք գերիների հարցով: Ամեն մի օրը, ամեն մի ժամն այնտեղ մնալով՝ այդ տղաների համար խնդիր է: Ե՛ւ նրանց համար է խնդիր ե՛ւ ծնողների համար եւ արժանապատվության հարց է բոլորիս համար»:
Այն դիտարկմանը՝ ԱԱԾ նախկին պետ Արթուր Վանեցյանը հայտարարում է, որ իշխանության լինելու դեպքում երեք օրում կլուծի գերիների հարցը, Դավիթ Սանասարյանը պատասխանեց. «ԱԱԾ նախկին տնօրենը, երբ պաշտոնի էր, մենք ունեինք 5 գերի եւ այդ հինգ գերու հետ կապված որեւէ լուծում չտեսանք: Գոնե որեւէ բան չեն խոսել, որ գերի են ուզում բերել»:
Նա կոչ արեց տարաձայնությունները թողնել մի կողմ եւ այդ հարցը լուծել՝ կապերն օգտագործելով. «Օրինակ՝ եթե ես խորհուրդ տայի, կաթողիկոսին կխնդրեի, որ գնար Հռոմի պապի մոտ, խնդրեր, որ իր կապերն օգտագործեր: Անընդհատ սեւ ու սպիտակ անելով, միմյանց նկատմամբ ատելություն տարածելով այս երկրում ոչ մի խնդիր չի լուծվելու»:
Կարդացեք նաև
Լուսինե ԲՈՒԴԱՂՅԱՆ
Լուսանկարը՝ արխիվային
