Բաքուն ռազմագերի չի համարում այն հայերին, որոնք Ղարաբաղում գերեվարվել են 2020թ. նոյեմբերի 10-ի եռակողմ համաձայնագրից հետո: Այս մասին հայտարարել է Ադրբեջանի արտգործնախարար Ջեյհուն Բայրամովը:
«Ադրբեջանը Հայաստանին է վերադարձրել բոլոր ռազմագերիներին: 2020թ. նոյեմբերի 26-ին Ադրբեջանի տարածքում ձերբակալված անձինք ռազմագերիներ չեն»,- այսօր ԵԱՀԿ գործող նախագահ Անն Լինդեի հետ համատեղ ճեպազրույցում հայտարարել է Բայրամովը:
Մեկնաբանելով ԵԱՀԿ մտահոգությունը հայ ռազմագերիների ճակատագրի վերաբերյալ՝ Բայրամովն ասել է, որ նրանք «ահաբեկիչներ» են: «Հայաստանը, կոպտորեն խախտելով 2020թ. նոյեմբերի 9-ի եռակողմ համաձայնագիրը, գաղտնի «Լաչինի միջանցքով» Ադրբեջանի տարածք է տեղափոխել հայկական զինված ուժերի անձնակազմ՝ քաղաքացիական հագուստով և քաղաքացիական փոխադրամիջոցներով: Ղարաբաղ հայ զինվորականների տեղափոխումն առաջ է բերել Հայաստանում զինծառայողների ընտանիքների դժգոհությունը, ինչպես նաև դա արձանագրել են անկախ լրատվամիջոցները»,- ասել է Բայրամովը:
Նա ընդգծել է, որ նման քայլերը հանգեցնում են իրավիճակի ապակայունացման, և կոչ է արել միջազգային կազմակերպություններին պատշաճ ճնշում գործադրել Հայաստանի վրա՝ նոյեմբերի 10-ի համաձայնագրի դրույթները կատարելու ուղղությամբ:
Կարդացեք նաև
«Հայաստանի ԶՈՒ տեղակայումը Ադրբեջանի միջազգայնորեն ճանաչված տարածքներում Հայաստանի միջազգային պարտավորությունների, մասնավորապես, պետությունների ինքնիշխանության և տարածքային ամբողջականության նկատմամբ հարգանքի կոպիտ խախտում է»,- ասել է Բայրամովը:
Պատրաստեց Վիկտորյա ԱՆԴՐԵԱՍՅԱՆԸ
