«Իշխանության այս համառությամբ, որով հրաժարվում են առերեսվել իրականության հետ, լարվածությունը պահպանվելու է։ Հստակ բան կա՝ պետք է ուշադիր ֆիքսենք, որ ոչ ադեկվատ են գնահատում իրավիճակը»,-ԱԺ-ում լրագրողների հետ ճեպազրույցում այսօր ասաց «Բարգավաճ Հայաստան» խմբակցության պատգամավոր Արման Աբովյանը։
Հիշեցնենք, որ ԱԺ պաշտպանության եւ անվտանգության հարցերի հանձնաժողովում քվեարկությամբ այսօր մերժվեց «Լուսավոր Հայաստան» եւ «Բարգավաճ Հայաստան» խմբակցությունների հեղինակած՝ ՀՀ-ում ռազմական դրությունը վերացնելու մասին նախագիծն ԱԺ լիագումար նիստերի օրակարգում ընդգրկելու հարցը։
Արման Աբովյանը նշեց․ «Երբ իշխանական պատգամավորը բողոքում է, որ Բաղրամյան պողոտան փակ է, եւ դա քաղաքացիների իրավունքների ոտնահարում է, դա զավեշտալի է։ Նոյեմբերի տասից այս կողմ բոլոր քաղաքացիների իրավունքներն են ոտնահարվում։ Ինչո՞ւ չեն խոսում Շուռնուխում ոտնահարված իրավունքների մասին»։
Կարդացեք նաև
Արման Աբովյանի խոսքով՝ իշխանությունը վախենում է վարչապետին անվստահություն հայտնելու գործընթացից, որը հիմա հնարավոր չէ՝ ռազմական դրության պահպանման պատճառով․ «Թող իրենք ասեն, թե ինչից են վախենում»։
Լուիզա ՍՈՒՔԻԱՍՅԱՆ
