«Հանդիպումը պետք է լինի բովանդակային։ Եթե պարզապես պետք է քննարկեն իրավիճակը, այսինքն՝ խոսեն խոսելու համար․․․ հասկանում ենք, որ իրավիճակը քննարկելու, ուղղակի խոսելու համար դա արդյունավետ չէ։ Հստակ պետք է հասկանալ, թե ինչի մասին է խոսքը»,-ԱԳՆ-ի դիմաց լրագրողների հետ զրույցում այսօր ասաց «Բարգավաճ Հայաստան» խմբակցության պատգամավոր, «Հայրենիքի փրկության շարժման» անդամ Արման Աբովյանը։
Հիշեցնենք, որ նախագահ Արմեն Սարգսյանը քաղաքական ուժերին հանդիպման էր հրավիրել եւ երեկ հայտարարել՝ «Բարգավաճ Հայաստան» խորհրդարանական խմբակցությունը և «Հայրենիքի փրկության շարժումը» հանդիպման համար առաջարկել են իրենց օրակարգն ու պայմաններ ներկայացրել, ուստի այս պահին մեկ սեղանի շուրջ հանդիպման ձևաչափը դառնում է անիրագործելի:
Արման Աբովյանը վերահաստատեց ԲՀԿ-ի օրակարգը՝ Նիկոլ Փաշինյանը պետք է հրաժարական տա, պետք է լինեն արտահերթ ընտրություններ․ «Գագիկ Ծառուկյանը վերահաստատել է իր դիրքորոշումը, որն անփոփոխ է՝ իշխանությունը պետք է հրաժարական տա, եւ որքան հնարավոր է շուտ պետք է լինեն ընտրություններ, որոնց արդյունքում նոր իշխանությունը երկիրը պետք է հանի ճգնաժամից։ Նոր իշխանությունն էլ ձեւավորում է ժողովուրդը։ Ենթատեքստ մի փնտրեք»։
Նշենք, որ վարչապետ Նիկոլ Փաշինյանն այսօր է այցելել ԱԳՆ՝ շնորհավորելու մարտի 2-ին նշված դիվանագետի օրը, եւ ցուցարարները հավաքվել են ԱԳՆ շենքի դիմաց։
Կարդացեք նաև
Լուիզա ՍՈՒՔԻԱՍՅԱՆ
