«Շարժումը հստակ ասել էր իր օրակարգը եւ պատրաստակամ եղել քննարկել։ Այն, ինչ անում էր նախագահը որպես միջնորդություն, ըստ էության, բավարարվել է շարժման կողմից, սակայն այն կարգավիճակը եւ այն վիճակը, որի շրջանակում նախագահը փորձեց այդ գործողությունը ձեռնարկել, ակնհայտ է, որ նաեւ իր հանդեպ վստահության պակաս կա»,-լրագրողների հետ զրույցում այսօր ԱԳՆ-ի դիմաց ասաց ՀՅԴ գերագույն մարմնի անդամ, ԱԺ նախկին պատգամավոր Արծվիկ Մինասյանը։
Հիշեցնենք, որ նախագահ Արմեն Սարգսյանը քաղաքական ուժերին հանդիպման էր հրավիրել եւ երեկ հայտարարել՝ «Բարգավաճ Հայաստան» խորհրդարանական խմբակցությունը և «Հայրենիքի փրկության շարժումը» հանդիպման համար առաջարկել են իրենց օրակարգն ու պայմաններ ներկայացրել, ուստի այս պահին մեկ սեղանի շուրջ հանդիպման ձևաչափը դառնում է անիրագործելի:
Արծվիկ Մինասյանը հիշեցրեց՝ եթե նախագահն ընթացք տար ԳՇ պետ Օնիկ Գասպարյանի ազատման գործընթացին (այսինքն, վարչապետի այդ միջնորդության հարցով դիմեր ՍԴ․-խմբ․), ապա նախագահի հանդեպ վստահության խնդիր չէր լինի․ «Այդ քայլից հետո միայն այս նախաձեռնած հանդիպումը կլիներ նախագահի կողմից սրտացավ վերաբերմունք։ Բոլորս ենք հասկանում, որ Նիկոլ Փաշինյանը բացարձակ ցանկություն չունի արտահերթ ընտրություններ իրականացնելու»։
Նշենք, որ «Հայրենիքի փրկության շարժման» տեղեկություններով՝ վարչապետ Նիկոլ Փաշինյանն այսօր է այցելելու ԱԳՆ՝ շնորհավորելու մարտի 2-ին նշված դիվանագետի օրը, եւ ցուցարարները հավաքվել են ԱԳՆ շենքի դիմաց։
Կարդացեք նաև
Լուիզա ՍՈՒՔԻԱՍՅԱՆ
