Պայմանագրային զինծառայող, վանաձորցի Հովհաննես Մխիթարյանը անցած տարի հուլիսի 6-ին Վանաձորի հրապարակում կանգնած՝ հեռախոսով խոսում էր։ Այդ պահին նա դիմակ չէր դրել, ինչը չի վրիպում ոստիկանի աչքից։ Հովհաննես Մխիթարյանը վերջինիս խնդրում է՝ չկազմել արձանագրություն, վաղը ինքը դիրքեր է բարձրանում, սրանից հետո ուշադիր կլինի, բայց ոստիկանը մնում է անդրդվելի։
Պարետի որոշմամբ սահմանված` պաշտպանիչ դիմակ չկրելու համար, Հովհաննես Մխիթարյանը ենթարկվում է վարչական տույժի՝ 10 հազար դրամի չափով, ըստ «ՀՀ վարչական իրավախախտումների մասին վերաբերյալ» օրենսգրքի 182.3 հոդվածի 1.1 կետի։
Կարդացեք նաև
Պայմանագրային զինծառայողի եղբայրը՝ Պետրոսը, Aravot.am-ի հետ զրույցում նշեց, որ սեպտեմբերյան պատերազմի թեժ օրերին փոստատարը բերեց ծրարը։ «Ճիշտն ասած՝ բարկացա, հետ տվի ծրարը, որովհետեւ արդեն մի քանի օր է՝ լուր չունեինք եղբայրներիցս (Պետրոսի երկու եղբայրները պայմանագրային զինծառայողներ են– Ա․Դ․) ու այդ պահին մեզ ոչինչ չէր հետաքրքրում»,–ասում է Պետրոսը։
Ուրբաթ՝ մարտի 12-ին, փոստատարը բերել է նույն ծրարը։ «Եղբայրս էլի մարտական դիրքերում է։ Ես գիտեմ օրենքի առաջ բոլորը հավասար են, բայց դիմակի համար տուգանե՞լ զինվորականի, որ այդ 10 հազար դրամը ինքը կարող է ծախսել ավելի անհրաժեշտ բաների համար»,–ասում է Պետրոսը՝ հույս ունենալով, որ գոնե ԴԱՀԿ–ն կալանք չի դնի, մինչեւ եղբայրը իջնի դիրքերից։
Արմեն ԴԱՎԹՅԱՆ
