«Ես մեծ հարգանք ունեմ մեր ընտանեկան արժեքների հանդեպ, ինքս էլ դրանց կրողներից եմ, ինչ- որ իմաստով հայկական «դոմոստրոյի» կողմնակից եմ, ինչպես կինս է ասում, բայց մենք պիտի հասկանանք՝ հայ հասարակությունում կանանց նկատմամբ վերաբերմունքը, տեղն ու դերը լուրջ մարտահրավեր է»,- Futures Studio-ի և լրագրող, հեղինակ Մարկ Գրիգորյանի համատեղ նախաձեռնած «Խոսենք ապագայից» շարքի շրջանակում հրավիրված առցանց քննարկման ընթացքում հայտարարեց ձեռներեց եւ բարերար, Futures Studio-ի հիմնադիր գործընկեր, «Ճամփաբաժանին» ձեռագրի համահեղինակ Ռուբեն Վարդանյանը:
Ըստ նրա՝ սա ոչ միայն վերաբերում է ընտանեկան բռնությանը է, պտղի սեռով պայմանավորված աբորտներին, այլև ինքնաիրացման հնարավորություններին:
Ռուբեն Վարդանյանը խոսեց նաև կեղծ մաչոյականության, կեղծ քրիստոնեականության մասին ու օրինակ բերեց. «Լավ օրինակ է հայերեն խոսելը: Բոլոր դպրոցները հայկական են, բայց հայերենի գիտելիքը, որակը այն չէ: Ասում ենք՝ Թուրքիա, բայց իրենք ունեն Օրհամ Փամուկ, ի՞նչ անենք, որ մենք էլ ունենայինք: Մենք ունենք Նարեկ Հախնազարյան, Սերգեյ Խաչատրյան, նրանց մասին պետք է խոսել և պետք է պայքարել կեղծ մաչոյականության, կեղծ քրիստոնեության դեմ: Առանց սրա հետ պայքարելու ոչինչ հնարավոր չէ անել»:
Ռուբեն Վարդանյանը տնտեսական առաջընթացը կապում է ճիշտ ընտրված մոդելի, տեխնոլոգիական, կրթական առաջընթացի, լավ համալսարաններ կառուցելու հետ:
Կարդացեք նաև
Խոսելով քաղաքական և անվտանգային խնդիրների մասին՝ բարերարն ասաց. «Մենք ապրում ենք մի երկրում, որը պատրաստվում է խաղաղ գոյակցության և′ Թուրքիայի, և′ Ադրբեջանի հետ: Բայց պետք է հասկանալ դրա բոլոր սպառնալիքները: Հարց է՝ ենթադրենք վաղը բացվում է Թուրքիայի հետ սահմանը, պատրա՞ստ ենք դրան, թե՞ Թիֆլիսի և Բաթումիի պես կդարձնեն: Թուրքական լոլիկների, մեր կանանց մասին նույնպես գիտենք, որոնք մարմնավաճառ են աշխատում Ստամբուլում, բայց ամաչում ենք: Ամաչել պետք չէ. պետք է հասկանանք՝ ինչպես անենք, որ դա չլինի»:
Տաթև ՀԱՐՈՒԹՅՈՒՆՅԱՆ
