CNN-ը հաղորդում է, որ նախկին առաջին տիկին Միշել Օբաման չորեքշաբթի օրը տեղի ունեցած հարցազրույցի ժամանակ անկեղծորեն խոսեց Covid-19 համաճարակի ընթացքում ծայրաստիճան ընկճվածության դեմ իր պայքարի և 2020 թ.-ի մարտահրավերների մասին՝ ամերիկացիներին խրախուսելով ավելի ազատ խոսել իրենց հոգեկան առողջության մասին:
«Դեպրեսիան հասկանալի է այս պայմաններում, այս ժամանակահատվածում», – ասել է նա People ամսագրին տված հարցազրույցում: «Մտածել, որ ինչ-որ կերպ մենք կարող ենք պարզապես շարունակել ապրել առանց ցնցումների, տրավմաների, հոգեկան խանգարումների՝ անիրատեսական է»:
«Սա է պատճառներից մեկը, որ մենք պետք է ավելի շատ խոսենք հոգեկան առողջության մասին, քանի որ բոլորը տարբեր ձևերով են արձագանքում տրավմային, անհանգստությանը և կամ էլ դժվարություններին», – ասել է Օբաման People’s-ին:
Covid-19 համաճարակն ու տնտեսական հետևանքները հանգեցրին Ամերիկայում հոգեկան առողջության ճգնաժամի, իսկ օգոստոսին ԱՄՆ հիվանդությունների վերահսկման և կանխարգելման կենտրոնի հետազոտությունը ցույց տվեց, որ հարցվածների գրեթե 41% -ը հայտնել է համաճարակից բխող հոգեկան առողջության հետ կապված խնդիրների մասին: Ամերիկացիներից յուրաքանչյուր երկրորդը ասում է, որ ունեցել է անհանգստության կամ դեպրեսիայի ախտանիշներ:
Կարդացեք նաև
Անցյալ ամառ Օբաման իր podcast- ում բացահայտեց, որ համաճարակի, ԱՄՆ-ում ռասայական խնդիրների աճի և քաղաքական բախումների թեժ շրջանում «ծայրաստիճան ընկճվածությունից» էր տառապում:
Օբաման People ամսագրին ասել է․ «Ես կարիք ունեի խոսելու նրա մասին, ինչի միջով անցնում էի, որովհետև մեզ մոտ հաճախ այն տպավորությունն է, որ մենք մեր զգացմունքները պետք է թաքցնենք և չխոսենք դրանց մասին, փոխարենը՝ ոտքի կանգնենք և փորձենք չթուլանալ»:
Օբաման նաեւ հայտնել է, որ պատվաստվել է Covid-19- ի պատվաստանյութով: «Ես խրախուսում եմ բոլորին պատվաստվել՝ հենց հնարավորություն ունենան», – ասել է նա:
Նախկին առաջին տիկինը նաև հայտնել է, որ համաճարակը թույլ է տվել իրեն և նախկին նախագահ Բարաք Օբամային կարանտինը տանը անցկացնելու ընթացքում ավելի ամուր հարաբերություններ հաստատել իրենց երկու դուստրերի հետ:
«Դրանք դժվար ժամանակներ են եղել: Շատերը պայքարում էին. կորցրած աշխատանքներ, սոված մարդիկ», – ասել է նա People-ին: «Մենք սովորել ենք աղոթել և գնահատել առողջության և ընտանիքի կարևորությունը»:
Պատրաստեց Մարիա ՉԻՉԱԿՅԱՆԸ
