«Ազատություն». Երեկ Դոհայի օդանավակայանում ուշ երեկոյան հանդիպել են Ռուսաստանի և Թուրքիայի արտգործնախարարները:
Այսօր նրանք Քաթարի արտգործնախարարի հետ եռակողմ բանակցությունների են մասնակցում Սիրիայի հարցով:
Քաթարում կայացած ռուս-թուրքական երեկվա բանակցություններին Սերգեյ Լավրովն ու Մևլութ Չավուշօղլուն քննարկել են նաև Ղարաբաղի թեման:
«Ռուսաստանի Դաշնության արտգործնախարար Սերգեյ Լավրովի հետ քննարկել եմ այսօր ռուս-թուրքական երկկողմ հարաբերությունները, Ղարաբաղը, Լիբիան և Սիրիան», – Թվիթերում երեկ ավելի ուշ գրել էր Չավուշօղլուն:
Կարդացեք նաև
Թուրքիայի արտգործնախարարը Դոհա էր ժամանել Ղրղըզստանի մայրաքաղաքից, իսկ Սերգեյ Լավրովը՝ Սաուդյան Արաբիայի: Նրանց բանակցություններն անցել են փակ դռների ետևում: Լրագրողներին միայն հաջողվել է լսել, թե ինչպես է Ռուսաստանի ԱԳ նախարարը Չավուշօղլուին կատակով հարցնում՝ արդյոք նա իր համար հուշանվեր բերե՞լ է Բիշքեկից, թե ոչ, և դիտե՞լ է՝ ինչպես են Ռուսաստանի և Թուրքիայի նախագահները մասնակցել «Ակկույու» ատոմակայանի երրորդ բլոկի շինարարության մեկնարկի արարողությանը:
Հակառակ ռուս և թուրք փորձագետների կանխատեսումների, ղարաբաղյան պատերազմը ռուս-թուրքական հարաբերությունները չի վնասել, գոնե հրապարակավ: Ռուսաստանի իշխանությունները հայտարարում են, որ հարաբերությունները ռազմավարական և բարեկամական են, թեև կան որոշ տարաձայնություններ: Ընդ որում՝ տարաձայնությունների շարքում Մոսկվան չի նշում Անկարայի դիրքորոշումը Ղարաբաղի հարցում:
Երեկ Ռուսաստանի մամուլի քարտուղար Դմիտրի Պեսկովը հակառակը՝ ընդգծել էր, թե չնայած Ղրիմի հարցում տարաձայնությունների առկայությանը, Մոսկվան և Անկարան ունեն ռազմավարական փոխգործակցություն և որպես օրինակ նշել էր փոխգործակցությունը Ղարաբաղում ռուս-թուրքական մոնիթորինգային կենտրոնի շրջանակներում:
Ազա ԲԱԲԱՅԱՆ
Նյութն ամբողջությամբ՝ սկզբնաղբյուր կայքում:
