«Այն պատգամավորը, որը պնդում է, թե գերիներին չեն վերադարձնում ներքաղաքական պատճառներով, պիտի բերի հիմնավորումներ՝ Ադրբեջա՞նն է հիմնավորում ՀՀ-ի ներքին գործերի պատճառով մեր գերիներին չվերադարձնելը։ Կարծում եմ՝ տրամաբանական կապ այստեղ չկա»,-խորհրդարանում լրագրողների հետ զրույցում այսօր ասաց «Լուսավոր Հայաստան» խմբակցության պատգամավոր Անի Սամսոնյանը։
Հիշեցնենք, որ «Իմ քայլի» պատգամավոր Նազելի Բաղդասարյանը պնդում է, թե հայաստանյան ներքաղաքական անկայունությունը խոչընդոտում է Ադրբեջանում պահվող հայ ռազմագերիների վերադարձին, բայց չի մանրամասնում, թե ինչ կերպ։
Անի Սամսոնյանի խոսքով․ «Պարզապես սա մանիպուլյացիա է՝ փորձ անելու այդ գործընթացը կապել այն քաղաքական ուժերի հետ, որոնք բողոքի ձայն են արտահայտում, եւ փորձ անելու մարդկանց դժգոհությունը հարուցել, որպեսզի մտածեն, թե բոլոր քաղաքական ուժերը սրիկա են եւ խանգարում են իրենց տղաների վերադարձին։ Նման բան լինել չի կարող։ Գերիների վերադարձին խանգարում են միայն բանակցողի սխալ հաշվարկները։ Ալիեւի հետ թուղթ ստորագրելուց առաջ պետք էր մտածել այդ մասին, պետք էր մտածել տղաների մասին, հետո նոր կատարել Ալիեւի կամքը։ Եթե դա չի արվել, թող որեւէ մեկի վրա մեղքը չգցեն»։
Լուիզա ՍՈՒՔԻԱՍՅԱՆ
