«Այն քաղաքական ուժերը, որոնք իսկապես ցանկանում են իրավիճակի հանգուցալուծում եւ ոչ թե իրավիճակի՝ սեփական շահերին ծառայեցում, պետք է պատրաստակամ լինեն ընդունելու նման հրավերները։ Նախագահի հրավերը մեկ բան է նշանակում՝ նստել սեղանի շուրջ եւ քննարկել վիճակը»,-խորհրդարանում լրագրողների հետ զրույցում այսօր անդրադառնալով նախագահ Արմեն Սարգսյանի կողմից վարչապետին, խորհրդարանական խմբակցությունների ղեկավարներին եւ «Հայրենիքի փրկության շարժման» ղեկավարներին հանդիպման առաջարկ հղելու փաստին՝ ասաց «Լուսավոր Հայաստան» խմբակցության պատգամավոր Անի Սամսոնյանը։
Հիշեցնենք, որ ԼՀԿ-ն պատրաստակամություն է հայտնել հանդիպելու։ «Դա կառուցողական հրավեր է, պարոն Մարուքյանը կմասնակցի։ Չեմ կարող ասել՝ նախաձեռնությունն իրատեսակա՞ն է, թե ոչ։ Նախագահն իր քայլն է արել, եւ գնդակը բոլոր քաղաքական ուժերի առաջնորդների, վարչապետի դաշտում է։ Եթե չեն ուզում, որ վիճակը խորանա, պետք է խոսեն։ Նախագահի հրավերը շատ լավ ձեւաչափ է շատ հարցեր պարզաբանելու եւ համաձայնության գալու, թե որն է ելքն այս իրավիճակից»,-համոզմունք հայտնեց Անի Սամսոնյանը։
Նա հիշեցրեց, որ խմբակցության օրակարգում արտահերթ ընտրություններն են, եւ այդ օրակարգն առհասարակ երկրի թիվ մեկ օրակարգն է։
Անի Սամսոնյանի խոսքով՝ եթե իշխանությունն իսկապես պատրաստ է արտահերթ ընտրությունների, ապա վարչապետ Նիկոլ Փաշինյանը հրաժարական պետք է տա առանց նախապայմանի։
Կարդացեք նաև
Արձագանքելով հարցին, թե Արմեն Սարգսյանն արդյոք ունի՞ բավարար վստահություն՝ քաղաքական ուժերին խորհրդակցությունների հրավիրելու համար, Անի Սամսոնյանը նշեց․ «Մեր եւ մյուս ուժերի տարբերությունը նրանում է, որ մենք համագործակցությունը տեսնում ենք ոչ թե անձանց հետ, այլ ինստիտուտների։ Եթե մեկ անգամ անձը չի կատարել իր պարտավորությունները, դա չի նշանակում, թե չպետք է գործակցենք։ Վերջին շրջանում նախագահն ակտիվ է, եւ դա ողջունելի է, որովհետեւ լարված իրավիճակում քաղաքական ուժերից ամեն մեկը սայլն իր կողմն է քաշում, իսկ Արմեն Սարգսյանը բոլորին կարող է հրավիրել մեկ սեղանի շուրջ։ Իսկ մենք պատրաստ ենք քննարկել առանց ղժղժոցների, վիրավորանքի եւ մարդավարի խոսել, թե ինչպես ենք դուրս գալու այս վիճակից»։
Լուիզա ՍՈՒՔԻԱՍՅԱՆ
