Սյունիքի մարզի Լծեն գյուղի վարչական ղեկավար Դերենիկ Հովհաննիսյանի խոսքով՝ ինքը պարզապես ապշել էր, որ կողոպտել էին «Սիսական» ջոկատի հրամանատար Աշոտ Մինասյանի հորական տունը։ «Մեր գյուղում բնակարանային գողություն կամ ոտնձգություն որեւէ մեկի տան վրա, ունեցվածքի վրա երբեք չի եղել։ Մարդիկ մինչեւ հիմա իրենց տների դարպասներն ու անասնաշենքերի դռները չեն կողպում»,–ասում է գյուղապետը։
Հիշեցնենք, որ մարտի 8-ին կողոպտել էին տունը՝ տանելով Աշոտ Մինասյանի զոհված եղբոր՝ Աղվան Մինասյանի մեդալները ու հիշատակ մասունքներ՝ արծաթյա շղթաներ եւ այլն:
Կարդացեք նաև
Աշոտ Մինասյանը նույնպես զարմացած է, եւ հայտարարել է, որ ինքը ոչ մի թշնամի չուներ, եւ չի կարող ասել, թե ովքեր եւ ինչու են այսպես արել։
Սիսիանի ոստիկանությունում հարուցվել է քրեական գործ։ Բաժնի պետ Ավետ Հովհաննիսյանը եւ բաժնի քրեական հետախուզության բաժանմունքի պետ Պետրոս Ալեքսանյանը մարզային «Սյունյաց երկիր» թերթի հետ զրույցում նշել են, որ քննության շահերից ելնելով դեռ ոչինչ չեն կարող ասել։ «Վարկածներ շատ կան, բայց առայժմ որեւէ վարկածի առաջնայնություն չենք տալիս, քանի որ ուսումնասիրվում են», – ասել է Ավետ Հովհաննիսյանը։
Նախնական վարկածով, ցանկացել են նաեւ տունը վառել, քանի որ վարագույրների մի մասը վառած էր, բայց կրակը շատ չէր բարձրացել։ Հետաքրքիր է, որ տունը տակնուվրա էր արված, տան կահկարասին, իրերը թափված էին հատակին։ Միաժամանակ՝ տասնյակից ավելի օղու շիշ էր բացված եւ տարբեր տեղերում օղին շաղ էին տվել։
Նշենք, որ Լծենի այդ առանձնատանը ներկա պահին ոչ մեկը չէր բնակվում։ Հայր ու որդի Մինասյանների ընտանիքները բնակվում են Սիսիանում։ Վերջին անգամ այդ տանը եղել էին օրեր առաջ՝ փետրվարի 12-ին։ Իսկ դեպքի մասին ահազանգել են հարեւանները՝ նկատելով տան բացված պատուհանները։
Արմեն ԴԱՎԹՅԱՆ
Լուսանկարները Աշոտ Մինասյանի ֆեյսբուքյան էջից եւ «Սյունյաց երկրի» կայքից
