Այս պահին Բաղրամյան պողոտայում և Դեմիրճյան փողոցում իրավիճակը շարունակում է լարված մնալ: Բոլոր ցուցարարները գոչում են «Ազգ, բանակ, հաղթանակ», «Առանց Նիկոլ Հայաստան»:
Ցուցարարները շրջափակել են ՀՀ ԱԺ-ի շենքը: ՀՅԴ Գերագույն մարմնի անդամ Արծվիկ Մինասյանը հայտարարեց՝ ՀՀ նախագահն, ունենալով հնարավորություն, չգնաց այդ քայլին և պատասխանատվությունից խուսափեց: Արծվիկ Մինասյանը հայտարարեց՝ ամո′թ, նախագահին: Ցուցարարները նրա հետևից գոչեցին. «Ամո′թ նախագահին»:
Կարդացեք նաև
Արծվիկ Մինասյանը շարունակեց. «Ժողովուրդն արդեն չորս ամսից ավել է իր վճռական խոսքն է ասում, բայց նախագահը լվաց իր ձեռքերը և փորձում է հեռանալ: Ժողովուրդն ինքն իր ձեռքով կհաստատի իր իշխանությունը: Մենք ԱԺ մուտքի մոտ ենք, որ փոխանցենք ժողովրդի իշխանությունը: Ժողովրդի իշխանությունն անբեկանելի է: Ժողովրդի իշխանությունն իրացնելու համար հաստատելու է ժողովրդի ազգային նոր իշխանություն: Որևէ մեկի մտքով թող չանցնի այս գործողություններն անօրինական համարել, դա Սահմանադրությամբ և միջազգային իրավունքով սահմանված իրավունք է: Ժողովուրդն իր իշխանությունն է իրացնում, հետևաբար մենք հաստատելու ենք մեր իշխանությունը և ձևավորելու ենք առանց Նիկոլ Հայաստան»:
Լրագրողների դիտարկմանը՝ փաստորեն իրավիճակը լարված է, Վազգեն Մանուկյանը պատասխանեց. «Փաստորեն, Արմեն Սարգսյանն իրավիճակը լարեց»:
Տաթև ՀԱՐՈՒԹՅՈՒՆՅԱՆ
