Հայաստանյան լրատվամիջոցներով տեղեկություն է շրջանառվում, որ ՅՈՒՆԻՍԵՖ-ի հայաստանյան գրասենյակի ղեկավարը՝ Մարիան Քլարկ–Հաթինգը լրտեսություն է արել հօգուտ Ադրբեջանի եւ Մեծ Բրիտանիայի, ինչի հետեւանքով էլ ՀՀ կառավարությունը որոշում է կայացրել դադարեցնել նրա գործունեությունը մեր երկրում՝ որպես ՅՈՒՆԻՍԵՖ-ի ներկայացուցչի: Լուրը սակայն, որեւէ կերպ չեն մեկնաբանում ՀՀ Ազգային անվտանգության ծառայությունից: Aravot.am-ի հարցին ի պատասխան, ԱԱԾ-ի մամուլի բաժնից ասացին՝ ԱԳՆ մամուլի խոսնակ Աննա Նաղդալյանն արդեն պարզաբանել է եւ ավելացնելու ոչինչ չունեն:
Մեր այն դիտարկմանը՝ Աննա Նաղդալյանի պարզաբանման մեջ որեւէ խոսք չկա լրտեսության մասին եւ խոսքը լրտեսության մասին է, եւ, սովորաբար, լրտեսներով ԱԱԾ-ն է զբաղվում, ազգային անվտանգության ծառայությունից կրկին հորդորեցին բավարարվել ԱԳՆ խոսնակի պարզաբանմամբ:
Հիշեցնենք, որ ԱԳՆ խոսնակ Աննա Նաղդալյանը նշել էր. «Հայկական կողմի համար խնդրահարույց է եղել ՀՀ-ում UNICEF ներկայացուցիչ Մարիան Քլարկ-Հաթինգի իր մանդատի իրականացման գործում թերացումները եւ ոչ համագործակցային աշխատելաոճը, ուստի ՀՀ կառավարության կողմից որոշում է կայացվել դադարեցնել Քլարկ-Հաթինգի պաշտոնավարումը որպես Հայաստանի Հանրապետությունում UNICEF ներկայացուցիչ»։
Թե ինչ խնդիրներ կան, որոնց պատճառով ՀՀ կառավարությունը որոշում է կայացրել դադարեցնել Քլարկ-Հաթինգի պաշտոնավարումը, ԱԺ Եվրոպական ինտեգրման հարցերի մշտական հանձնաժողովի նախագահ Արման Եղոյանը նույնպես տեղյակ չէր: Այսօր նա լրագրողների հետ զրույցում ասաց՝ չգիտեմ:
Կարդացեք նաև
«Եթե լրտեսությամբ է զբաղվել, դա լրիվ այլ թեմա է, եթե անգործություն է ցուցաբերել կամ էլ ոչ պատշաճ աշխատանք՝ այլ թեմա է»:
Տիկին Մարիան Քլարկ-Հաթինգի կենսագրականից, որը զետեղված է ՅՈՒՆԻՍԵՖ-ի հայաստանյան գրասենյակի կայքում, տեղեկանում ենք, որ նա մեր երկրում ներկայացուցչի ղեկավարությունը ստանձնել է 2020 թ. հուլիսին: Մինչ այդ՝ 2016–2020 թթ․, որպես ՅՈՒՆԻՍԵՖ–ի ներկայացուցիչ պաշտոնավարել է Մալազիայում։ Նույն աղբյուրից տեղեկանում ենք, որ ՅՈՒՆԻՍԵՖ–ում աշխատանքային գործունեությունը սկսել է Մադագասկարից, որտեղ աշխատել է 5 տարի:
Ապա աշխատել է Բուլղարիայում՝ «Սեյվ դը Չիլդրեն» կազմակերպության ղեկավար: 2000 թ. նորից աշխատանքի է անցել ՅՈՒՆԻՍԵՖ–ում՝ այս անգամ պաշտոն ստանձնելով Նյու Յորքում։ Նույն առաքելությամբ աշխատել է նաեւ Գվինեայում, Բենինում, Սոմալիում, Իտալիայում, Չինաստանում:
Լուսինե ԲՈՒԴԱՂՅԱՆ
