«Ադրբեջանում հայատյացության քաղաքականության եւ էթնիկ հայերի նկատմամբ թշնամանքի խորքային ապացույցները Արցախի եւ Հայաստանի մարդու իրավունքի պաշտպանները ներկայացրել են իրենց համատեղ զեկույցում»,- մարտի 9-ին Մեդիա կենտրոնի «Քսենոֆոբիան՝ Ադրբեջանում. գեներացվող ատելություն» թեմայով առցանց քննարկման ժամանակ նշեց ՀՀ ՄԻՊ օգնական Տաթեւիկ Մանուկյանը: Զեկույցում փաստվում է, որ ադրբեջանական կողմի ատելությունն ու անհանդուրժողականությունը Արցախի հայ բնակչության համար գոյապահպանական լուրջ վտանգներ է ստեղծում։
«Սեպտեմբերի 27-ից սկսած իրականացվել է մշտադիտարկում, որի արդյունքում պարզվել է, որ Արցախի, այդ թվում` խաղաղ բնակչության նկատմամբ նախաձեռնած հարձակումներն իրականացվել են էթնիկ հայերի նկատմամբ մեծ ծավալի ատելության խոսքով: Ընդ որում, այս մեծածավալ ատելության խոսքն ուղեկցվել է նաեւ բռնության, նաեւ սպանության կոչերով:
Այս բոլոր հրապարակումները տարածվել են թուրքական եւ ադրբեջանական աղբյուրներից: Զեկույցում ներկայացված ապացույցներն ուղարկվել են մարդու իրավունքների պաշտպանության մանդատ ունեցող միջազգային կառույցներին ու կազմակերպություններին: Զեկույցը գրվել է անգլերեն: ՀՀ մարդու իրավունքների պաշտպանը մշտական կապի մեջ է այդ կազմակերպությունների հետ»,-ասաց ՀՀ ՄԻՊ օգնականը:
Թրանսփարենսի ինթերնեշնլե հակակոռուպցիոն կենտրոնի գործադիր տնօրեն Սոնա Այվազյանը նշեց, թե ինչից է ծագել զեկույցի գաղափարը: «Երբ պատերազմը սկսվեց, մի խումբ ՀԿ-ներ, որոնք Հայաստանում զբաղվում են մարդու իրավունքներով, սկսեցին դիմումներ, բողոքներ գրել տարբեր, այդ թվում` ՄԱԿ-ի, ԵԽ-ի կառույցներին: Բողոքներ են ներկայացվել տարբեր հարցերով` կրթություն, վարձկաններ, առողջապահություն, գերիներ եւ այլն:
Կարդացեք նաև
Հասկացանք, որ այդ բոլոր զեկույցների, բողոքների մեջ կարմիր թելի նման անցնում էր քսենոֆոբիան, որը հիմնական խնդիրն էր հանդիսանում պատերազմի գաղափարի, մարդասպանության, այն մեթոդների, որ կիրառվում էին պատերազմի ընթացքում եւ դրանից առաջ: Այդ ամենը մեզ հուշեց, որ պետք է ամփոփենք ատելության դրսեւորումների տարբեր դրվագները զեկույցում»:
Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը անդրադառնալով զեկույցից ակնկալվող արձագանքին` ասաց. «Զեկույցում իրապես ոչ միայն նկարագրված են 44-օրյա պատերազմի ընթացքում ատելության խոսքի դրսեւորումները, սպանությունները, խոշտանգումները, քաղաքացիական ենթակառուցվածքների թիրախավորումը, այլեւ այն, որ դրանք ներկայացվել որպես ատելության դրսեւորմամբ օրինակներ` ըստ էթնիկ պատկանելության»:
Տաթեւիկ Մանուկյանի խոսքով, զեկույցը նախեւառաջ ապացուցում է, որ այս պատերազմի ընթացքում ադրբեջանական դաժանությունները ուղղված հայկական կողմի զինվորականների եւ քաղաքացիական անձանց, բացահայտ թշնամանքի, քարոզի ու կազմակերպված հայատյաց քաղաքականության արդյունք են:
«Զեկույցն ապացուցում է, որ Ադրբեջանում հայատյաց քաղաքականությունը փակ շղթայի մեջ է, գեներացվում է Ադրբեջանի իշխանական մարմինների կողմից, այդ թվում` բարձրագույն մարմինների կողմից, ապա գրեթե նույն ձեւակերպումներով, արտահայտություններով օգտագործվում է մշակութային ու սպորտային ներկայացուցիչների կողմից` արժանանալով գովասանքի: Այս ամենն իրականացվում է հաճախ թիրախավորելով նաեւ երեխաներին»:
Մանրամասն՝ տեսանյութում
Գոհար ՀԱԿՈԲՅԱՆ
