Հայաստանում ապրում է 1 միլիոն 562 հազար 700 կին: Տասը տարվա ընթացքում մեր երկրում կանանց թիվը ոչ միայն չի ավելացել՝ մի բան էլ պակասել է: 2010-ին Հայաստանի բնակչության 1 միլիոն 589 հազար 400-ն է եղել իգական սեռի: Այս մասին տեղեկանում ենք վիճակագրական կոմիտեի ցուցանիշներից: Վիճակագիրները կանանց թվաքանակի նվազումը բացատրում են Հայաստանի՝ ժողովրդագրական ծերացումով, ծնելիության ցածր մակարդակով եւ արտագաղթի բարձր տեմպով:
Միայն Երեւանում բնակվում է 583 հազար 462 կին: Ի դեպ, Երեւանը միակ բնակավայրն է, որտեղ կին-տղամարդ համամասնությունը զգալի է: Մայրաքաղաքում կանայք 83 հազարով ավելի են տղամարդկանց թվից: Մնացած մարզերում այդ խզումը չի հասնում 10 հազարի:
Ըստ վիճակագիրների, Հայաստանում բարելավվել է կյանքի սպասվող տեւողությունը մասնավորապես՝ կանանց համար: Այսպես՝ աղջիկ երեխաների կյանքի սպասվող տեւողությունը կազմել է 79,5 տարի: Համեմատության համար նշենք, որ տղամարդկանց կյանքի սպասվող տեւողությունը 73,1 տարի է: Սրանով էլ պայմանավորված, Հայաստանում ավելի շատ կանայք են այրի մնում, քան տղամարդիկ ամուրի:
Երեւանում 63 տարեկանից բարձր 110 հազար կին կա, Արագածոտնում՝ 63 հազար 941 կնոջից 9 հազարն է 63 տարեկանից բարձր: Արարատի մարզում ապրում է 133 հազար 43 կին, որից 18 հազարը 63 տարեկանից բարձր է: Արմավիրի մարզում 136 հազար 6 կնոջից 19 հազարն է 63 տարեկանից բարձր, Գեղարքունիքում 114 հազար 352 կնոջից՝ 16 հազարը: Լոռիում ներկայումս 116 հազար 402 կին է ապրում, որից 21 հազարը 63 տարեկանից բարձր տարիք ունեն, Կոտայքում 131 հազար 217 կնոջից 19 հազարն է 63 տարեկանից բարձր: Շիրակում 124 հազար 82 կին կա, նրանցից 20 հազարը 63 տարեկանից բարձր են: Սյունիքում 70 հազար 704 կին է ապրում, որից 63 13 հազարը 63 տարեկանից բարձր տարիքային խմբում են: Վայոց ձորում 25 հազար 429 կին է ապրում: Այս մարզում 63 տարեկանից բարձր կանայք 4 հազարն են: Տավուշում 64 հազար 51 կնոջից 12 հազարը 63 եւ ավելի տարիք ունի:
Կարդացեք նաև
Մեր երկրում կանանց առաջին ամուսնության միջին տարիքը եւս փոխվել է՝ քսան տարիների ընթացքում 22,6-ից դառնալով 27, 7: Վիճակագիրները մի ուշագրավ հանգամանք էլ են նկատել: Հայաստանում ամուսնալուծված կանանց կրկին ամուսնանալու շանսն ավելի նվազ է, քան ամուսնալուծված տղամարդունը:
Հայաստանում գյուղատնտեսության ոլորտում զբաղվածների 48 տոկոսը կանայք են: Տեղեկատվության եւ կապի ոլորտում աշխատողների 44 տոկոսն է կին: Արդյունաբերությունում 33 տոկոս են կանայք կազմում:
Ֆինանսական եւ ապահովագրական գործունեությամբ զբաղվող կազմակերպություններում 60 տոկոսն են կանայք: Առեւտրի, նորոգման, փոխադրումների, հանրային սննդի կազմակերպման ոլորտներում աշխատողների 39 տոկոսը կանայք են: Շինարարությունում զբաղվածների ընդամենը 1 տոկոսն են կանայք: Փոխարենը պետական կառավարման, կրթության, առողջապահության եւ բնակչության սոցիալական սպասարկման ոլորտներում զբաղվածների 62 տոկոսը կանայք են:
Ներկայումս մեր երկրում 336 հազար կին վարձու աշխատող է, 2000 կին՝ գործատու, ինքնազբաղված է 123 հազար կին: Վեց հազար կին էլ առանց վարձատրության աշխատող է, այսինքն՝ ընտանիքի անդամ:
Հայաստանում աշխատող կանանց 19,7 տոկոսը 65-75 տարեկան է: Ամենաշատ զբաղվածները 25-49 տարեկաններն են, կին աշխատողների 47,5 տոկոսը:
Վիճակագիրները պարզել են, որ երկարատեւ գործազրկության մակարդակը բարձր է հատկապես՝ կանանց շրջանում: Գործազուրկ կանանց 48 տոկոսը մեկ տարուց ավելի աշխատանք են փնտրել: Տարեցների եւ հաշմանդամների սոցիալական սպասարկման կազմակերպություններում ավելի շատ կանայք են խնամվում, քան տղամարդիկ: Այդ կենտրոններում 51 տոկոսը կանայք են:
Մեր երկրի միջին մասնագիտական ուսումնական հաստատություններում ներկայումս սովորում է 12 հազար 985 իգական սեռի ներկայացուցիչ: Բարձրագույն կրթության հաստատություններում՝ 34 հազար 368 կին:
Լուսինե ԲՈՒԴԱՂՅԱՆ
