Պռոշյանի «Զորաց» պանթեոնում այսօր էլ մարդաշատ էր:
Այստեղ էին կանայք`մայրեր, քույրեր, այրիներ. իրենց զոհված հարազատների աճյուններին դրեցին այն ծաղիկները, որոնք իրենք պետք է այսօր նվեր ստանային:
Պանթեոնում ամփոփված են արցախյան առաջին եւ երկրորդ`44-օրյա պատերազմում զոհված Պռոշյանի գնդի անդամների աճյունները:
Պռոշյան ավանի զոհերի որոշ անուններ
Պանթեոնում տեղի ունեցավ 19 ՀՕՄ-ուհիների՝ Հայ օգնության միությանն անդամակցության ուխտի արարողությունը։
Կարդացեք նաև
Կանայք՝ որդիների, հայրերի եւ ամուսինների շիրիմների մոտ երդվեցին` անձնվիրաբար եւ խոնարհաբար ծառայել հայ ժողովրդին ու հայրենիքին:
Հայ օգնության միության հայաստանյան շրջանային վարչության ատենապետուհի Մարինե Համբարձումյանը տեղ ընտրության վայրն այսպես բացատրեց. «1991 թվականից, երբ արցախյան ազատամարտը սկսվել է, ՀՕՄ-ը շատ մեծ կապ է ունեցել Պռոշյանի կամավորների հետ: Այստեղ մեծ գունդ կար: Նաեւ զորավիգ ենք եղել բոլոր կատարած աշխատանքներին: Ինչո՞ւ այսօր այստեղ, որովհետեւ մեկ օրում 17 զոհ ունեցանք: Տղաներ, որոնց մենք ճանապարհ դրեցինք սեպտեմբերի 27-ին. այդ խինդը, հավատը, որ տղաները գնում են իրենց երկրին սատար կանգնելու, օգնելու, փրկելու… այդ օրվա խորհուրդը շատ մեծ էր: Երբ իմացանք նրանց կորստի մասին, հավատացեք, մինչ օրս ուշքի չենք գալիս: Մեկը թողել էր կնոջը, երեխաներին, մյուսը`ծեր մորը, որպեսզի կարողանար օգտակար լինել»:
Ի դեպ, այսօր նաեւ Երվանդ Թադեւոսյանի (Չախկալ) ծննդյան օրն է: Նա մասնակցել է նաեւ արցախյան առաջին պատերազմին: Զոհվեց 44-օրյային:
Նելլի ԳՐԻԳՈՐՅԱՆ
