«Հայրենիքի փրկության շարժման» վարչապետի թեկնածու Վազգեն Մանուկյանը հանրահավաքի ընթացքում ասաց, որ նախագահ Արմեն Սարգսյանն իր առարկությունները՝ կապված Գլխավոր շտաբի պետ Օնիկ Գասպարյանի պաշտոնանկության հետ պետք է դեռ երեք օր առաջ ուղարկեր Սահմանադրական դատարան։
«Ես կոչ եմ անում բանակին, դուք հիմա գտնվում եք ռազմաճակատում, ձեր մեջքի հետևում Հայաստանն է։ Ձեր որոշումից, ինչպես պատերազմի ժամանակ, շատ բան է կախված։ Նույնը հիմա է, պատերազմն է շարունակվում։ Եվ ոչ մի հրամանի չպետք է ենթարկվեք, ինչ կորոշի դատարանը, ինչ կորոշի Սահմանադրական դատարանը, մենք դրանից անցել ենք։ Պետությունը մահանում է, և պետության փրկությունը ցանկացած օրենքից բարձր է»,- ասաց նա։
Վազգեն Մանուկյանը կոչ արեց քաղաքացիներին լինել քաղաքակիրթ, համբերատար, բայց՝ չափավոր․ «Ասում են՝ ժողովուրդը իրավունք չունի ապստամբություն բարձրացնելու, ո՞վ ասաց։ Եթե ժողովրդին սպանում են, ժողովուրդը պե՞տք է ենթարկվի։ Ժողովուրդը պետք է կարողանա ոտքի կանգնել և անել այն, ինչ ուզում է։ Ես դրա համար կոչ եմ անում ամբողջ ժողովրդին՝ պաշտպանե՛ք ձեզ, հավաքվե՛ք, կազմակերպվե՛ք, համագործակցե՛ք իրար հետ, և մենք կհաղթենք»։
Հանրահավաքն ավարտվեց, ինչից հետո քաղաքացիները երթով շարժվեցին դեպի նախագահական պալատ, որից հետո անցնելու են Երևանի տարբեր փողոցներով։
Կարդացեք նաև
Ամի ՉԻՉԱԿՅԱՆ
