«Սյունիքում պետք է ստեղծվի ապառազմականացված անվտանգության գոտի»,-լրագրողների հետ հանդիպմանն այսօր հայտարարեց ՀՀ մարդու իրավունքների պաշտպան Արման Թաթոյանը՝ ներկայացնելով ապառազմականացված գոտու վերաբերյալ իր մշակած հայեցակարգը։
Նրա խոսքով՝ Սյունիքում համակողմանի ուսումնասիրությունները եւ ապացույցները վկայում են նման գոտու անհրաժեշտության մասին, եւ հայեցակարգը հիմնված է, այդ թվում՝ միջազգային իրավունքի վրա։ «Քանի դեռ առկա խնդիրների հետ կապված չկա որոշակիություն, ապառազմականացված գոտին անհրաժեշտություն է։ Ամենը տեղի է ունեցել պատերազմի, կյանքի իրավունքի սպառնալիքի ներքո։ Հայեցակարգի էությունն այն է, որ անվտանգության գոտին պետք է ստեղծվի առնվազն 5-7 կմ տարածքով։ Սա ապացույցների վրա հիմնված հաշվարկ է՝ հաշվի առնելով բնակիչների իրավունքների պաշտպանությունը եւ այն զինատեսակների հեռավորությունը, որոնք բնակիչների ուղղությամբ կիրառում է Ադրբեջանը»,-նշեց ՀՀ ՄԻՊ Արման Թաթոյանը։
Նա հայտնեց, որ այս հայեցակարգը ներկայացրել է միջազգային կառույցներին՝ մատնանշելով, որ նման խախտումներով սահմանազատման գործընթացը պետք է դադարեցվի անհապաղ եւ վերանայվի․ «Մեր մի շարք գործընկերներ երեկ կապվել են եւ խնդրել այս փուլում մանրամասներ չհրապարակել, եւ մենք պատասխաններ ենք ստացել, որ իրենք ընթացք են տվել մեր բարձրաձայնած հարցերին։ Այստեղ միջազգային հանրությունը մեծ անելիք ունի»։
Կարդացեք նաև
Լուիզա ՍՈՒՔԻԱՍՅԱՆ
