Արարատի եւ Արմավիրի մարզերում Հայաստանի Հանրապետության տարածքային կառավարման եւ ենթակառուցվածքների նախարարության ջրային կոմիտեի, դրա կառուցվածքային ստորաբաժանումների եւ ջրային տնտեսության ծրագրերի իրականացման գրասենյակի գործունեության արդյունավետությունն ուսումնասիրող քննիչ հանձնաժողովի կատարած աշխատանքների վերաբերյալ զեկույցը մարտի 4-ի նիստում ներկայացրեց քննիչ հանձնաժողովի նախագահ Ծովինար Վարդանյանը: Զեկույցը 5 հիմնական մասից է բաղկացած:
Քննիչ հանձնաժողովն ուսումնասիրել է 2016-ի կառավարության հաստատած Ոռոգման ոլորտի ֆինանսական կայունության բարելավման ռազմավարությունը: Զեկուցողը նշեց, որ ռազմավարության արդյունքում պլանավորած ցուցանիշերը թեպետ պետական ընթացիկ ֆինանսավորման մասով նվազող թվեր են նախատեսում, սակայն որոշ ծախսային հոդվածներ նախատեսում են բավականին մեծ տոկոսային աճ: Հատկանշական է, որ ընդհանուր ծախսերի ցուցանիշը միայն 2021-ին էր մոտենալու 2016-ի ելակետային թվերին:
«Այս ռազմավարության նպատակային ցուցանիշների աղյուսակն ավելի նման է ծախսերի վերաբաշխման աղյուսակի, քան ոռոգման ոլորտի ֆինանսական կայունության բարելավմանն ուղղված ծրագրի»,-նշեց Վարդանյանը: Զեկույցն ընդունվեց ի գիտություն:
Ազգային ժողով
