«Ռուսների առաքելությունն ադրբեջանցիների համաձայնությամբ է իրականացվում, ինչը ռուսների համար դժվար է՝ իրավիճակի կառավարելիության տեսանկյունից։ Նրանք Արցախում են՝ Բաքվի բացահայտ համաձայնությամբ»,-«Futures Studio»-ի կազմակերպած՝ «Խոսենք ապագայից» խորագրով շարքի հերթական քննարկման ժամանակ այսօր անդրադառնալով Արցախում ռուսական խաղաղապահ առաքելությանը եւ դրա՝ հինգ տարվա ժամկետ ունենալու փաստին՝ ասաց «Carnegie Europe» հիմնադրամի ավագ գիտաշխատող, Հարավային Կովկասի հարցերով փորձագետ Թոմաս դե Վաալը։ Նա նշեց․
«Ես էլ որոշակի վախեր ունեմ, որ այս ամենը հինգ տարի հետո կարող է փլուզվել, գուցե ավելի շուտ, եթե հաշվի առնենք ՌԴ-ի հարաբերությունները Թուրքիայի հետ։ Կարծում եմ՝ քանի դեռ այդ երկու ռեժիմները կան ՌԴ-ում եւ Թուրքիայում, նրանք եւ մրցակցում են, եւ միաժամանակ՝ լավ հասկանում իրար։ Երբ Պուտինը հեռախոսով զրուցում է Էրդողանի հետ, դժվար բանակցություններ են ընթանում, բայց նրանք հարգում են իրար, հասկանում են, որ ընդհանուր հետաքրքրություններ ունեն»։
Լուիզա ՍՈՒՔԻԱՍՅԱՆ
