«Դա կլինի Ղարաբաղի վերջնական կործանում, եթե իշխանությունները տեղի տան: Հիմա նկատվում է, որ Արցախի և ՀՀ իշխանություններն ուզում են տեղի տալ»,- «Հանուն Հադրութի» հասարակական կազմակերպության հավաքի ընթացքում հայտարարեց «Հանուն Հադրութի» ՀԿ-ի նախագահ Լեւոն Հայրյանը:
Հավաքին մասնակցող տասնյակ հադրութցիներ, Քաշաթաղի, Շուշիի բնակիչներ երթով շարժվեցին ԵԱՀԿ Մինսկի խմբի համանախագահ երկրների դեսպանատներ՝ իրենց պահանջը ներկայացնելու:
ՀՀ-ում Ռուսաստանի դեսպանատան մոտ նրանք հայտարարեցին. «Մենք պահանջում ենք վերադարձ մեր Հադրութ, մեր հայրենի հող, մենք խնդրում ենք, ստիպում ենք բոլոր դեսպաններին, դեսպանատներին: Հադրութի, Շուշիի, Քաշաթաղի բնակիչները հավաքվել են, տեսնում եք՝ ինչ վիճակում են: Ուզում ենք վերադառնալ հայրենի հող: Նախկին ԼՂԻՄ տարածքներն ենք պահանջում»:
Կարդացեք նաև
Հավաքի մասնակիցները հայտարարեցին՝ ցույցերը շարունակելու են այնքան ժամանակ, մինչև պատասխան ստանան դեսպանատներից:
Լևոն Հայրյանը վստահեցրեց՝ իրենց ցույցերը քաղաքական բաղադրիչ չունեն. սոցիալական խնդիրներ են բարձրացնում:
Նա հայտարարեց. «Մեր հիմնական նպատակն է պարզաբանում մտցնել ապագայի վերաբերյալ, հիմնական պահանջը մեր հայրենիք վերադարձն է»:
Նա նշեց՝ մեկ ամսից ավել է դեսպանատներն իրենց չեն ընդունում, ցանկանում են իմանալ՝ պատճառը որն է: Ու վստահեցրեց՝ այսօր պիտի «նաստիռնի» պահանջենք:
Այս անգամ էլ դեսպանատներում չընդունեցին հադրութցիներին: Ֆրանսիայի դեսպանատանն ասացին՝ հադրութցիների այլ խմբի արդեն ընդունել են:
Հավաքի մասնակիցները նշեցին՝ ցույցերը լինելու են շարունակական, եթե դեսպանների հետ հանդիպել չհաջողվի, հասնելու են նրան, որ կարողանան տվյալ երկրների ղեկավարների հետ կապ հաստատել:
Լևոն Հայրյանը հայտնեց՝ ԱՄՆ դեսպանատանն էլ իրենց ասել են, որ եթե երեք շաբաթ չպատասխանեն, ուրեմն մերժված են, իսկ երեք շաբաթը լրանում է վաղը:
Լևոն Հայրյանը մտահոգություն հայտնեց՝ ՀՀ իշխանություններն իրենց իրավիճակին համարժեք չեն պահում. «Չենք տեսնում ՀՀ իշխանությունների համապատասխան վերաբերմունքը, հետաքրքրվածությունը: Սոցիալական օգնություն ցուցաբերում են, բայց պետությունը պիտի ազգային, պետական քաղաքականություն վարի, ինչը բացակայում է»:
Լևոն Հայրյանը տեղեկացրեց՝ հադրութցիների, շուշեցիները, քաշաթաղցիների զգալի մասը Արցախ-Հայաստան ճանապարհին է. ոչ մի տեղ չեն կարողանում իրենց գտնել, իրենց հայրենի հողն են ուզում:
Նա հայտնեց՝ նրանց 60-70 տոկոսը Հայաստանում է բնակվում, մնացածը՝ Արցախում:
Նշենք, որ հադրութցիների հավաքին մասնակցում էին նաև Սասնա ծռեր խմբի անդամ Պավել Մանուկյանը և Արցախի ԱԺ նախկին պատգամավոր Վահան Բադասյանը:
Տաթև ՀԱՐՈՒԹՅՈՒՆՅԱՆ
