«Պարոն Միրզոյան, ինչո՞ւ այստեղ չէ ԲԴԽ նախագահ Ռուբեն Վարդազարյանը, որը ներկայացնում էր թեկնածուներին»,-ԱԺ լիագումար նիստում այսօր ՀՀ վճռաբեկ դատարանի դատավորի պաշտոնում ՀՀ վերաքննիչ քաղաքացիական դատարանի գործող դատավոր Արսեն Մկրտչյանի թեկնածության հարցի քննարկման ժամանակ ԱԺ նախագահ Արարատ Միրզոյանին հարցրեց անկախ պատգամավոր Արման Բաբաջանյանը։
Նա տեղեկացրեց․ «Երեկվա եւ նախորդ օրվա թեժ քննարկումներից հետո օրենքով գողեր են կապվել ինձ հետ եւ սպառնալից հայտարարություններ արել։ Իհարկե, հասկանալի է, թե ովքեր են այսօր հովանավորվում դատական համակարգի կողմից նաեւ, այդ թվում՝ ԲԴԽ-ի կողմից։ Զգուշացնում եմ՝ սատանի մայլում քյանդրբազություն չանեք։ Դուք իմ վախը վաղուց բռնել եք։ Ես 3,5 տարի անազատության մեջ լինելով՝ գողերի հետ էլ եմ նստել, քրեական հեղինակությունների հետ էլ եմ առնչվել, այնպես որ՝ վեր ընկեք տեղներդ։ Կգանք ձեր հետեւից»։
Արարատ Միրզոյանն արձագանքեց․ «Թեկնածուներին ներկայացնող Ռուբեն Վարդազարյանն այս փուլում անելիք չունի եւ կարող է նաեւ բացակայել։ Ինչ վերաբերում է ձեր ասածին, սպառնալիքները հանցագործության տարրեր են պարունակում, կարող ենք սա համարել հաղորդում հանցագործության մասին»։
Հիշեցնենք, որ նախորդ օրը Արման Բաբաջանյանը ԲԴԽ նախագահ Ռուբեն Վարդազարյանին անվանեց «Սերժ Սարգսյանի եւ Ռոբերտ Քոչարյանի օրոք վնգստացող դատավոր»։
Կարդացեք նաև
Լուիզա ՍՈՒՔԻԱՍՅԱՆ
