«Դուք իհարկե ունեք արդարանալու իրավունք, բայց մի վիրավորեք մեր բանականությունը: Ի՞նչ է նշանակում՝ իմ հայտարարությունը չի ունեցել քաղաքական բաղադրիչ․․․եռակողմ հայտարարության ստորագրումից հետո ամբոխը ներխուժել է կառավարություն, ԱԺ, կառավարական ամառանոց, մահափորձ է եղել ԱԺ նախագահի դեմ, տեղեկություններ են հայտնվել, որ վարչապետի դեմ է մահափորձ նախապատրաստվում, եւ այս ամենից օրեր անց դուք այս համատեքստում անում եք հայտարարություն՝ վկայակոչելով քաղաքական անձի՝ վարչապետի խոսքերը վնգստացող դատավորների մասին, հեգնանք օգտագործելով այդ մարդկանց մասին»,-ԱԺ նիստում այսօր ՀՀ բարձրագույն դատական խորհրդի նախագահ Ռուբեն Վարդազարյանին այսպես դիմեց «Իմ քայլի» պատգամավոր Ռուբեն Ռուբինյանը՝ նկատի ունենալով նոյեմբերին Վարդազարյանի արած հայտարարությունը, որում նա օգտագործել է «վնգստացող դատավորներ» արտահայտությունը։
Այսօր Վարդազարյանն ասել էր, որ այն քաղաքական բաղադրիչ չուներ։ Ռուբեն Ռուբինյանը նշեց․ «Ցանկացած բանական մարդու համար պարզ է, որ դուք նկատի եք ունեցել հետեւյալը՝ դատավորներ ջան, պատերազմն ավարտվեց վատ արդյունքով, ԱԺ նախագահի դեմ մահափորձ եղավ, երկրում քաոս է, այսքան դիմացել ենք, ժամանակն է՝ մի զսպվեք․․․Գուցե ձեր կոչը չզսպվելո՞ւ կոչ էր։ Դուք տապալել եք ձեր առաքելությունը՝ որպես ԲԴԽ նախագահ եւ անցել եք քաղաքականության գիծը։ Ձեր ընտրությունն է, բայց մի վիրավորեք մեր բանականությունը։ Մտածե՞լ եք հրաժարական տալու մասին»։
Ռուբեն Վարդազարյանը պատասխանեց․ «Ոչ, չեմ մտածել։ Թույլ տվեք ինքս ընտրել այն ժամանակը, երբ կմտածեմ այդ հարցի մասին»։ Ռուբինյանը շարունակեց․ «Մնացած հարցերին էլ պատասխանեք ու հիմնավորեք, թե ինչ եք նկատի ունեցել ասելով «վնգստացող դատավորներ»։ Ինչի՞ց էիք ուզում դատավորներին զսպել, եթե ասում եք, որ զսպելու կոչ էր դա»։ Ռուբեն Վարդազարյանը պատասխանեց․ «Կոչս հետեւյալն էր՝ սթափվել եւ չտրվել քաղաքական գործընթացներին, առաջնորդվել օրենքով։ Այլ բաղադրիչ իմ կոչը չուներ՝ անկախ նրանից, թե քանի անգամ այստեղ կասեք, թե կոչս քաղաքական էր»։
Կարդացեք նաև
Լուիզա ՍՈՒՔԻԱՍՅԱՆ
