Ազգային ժողովն այսօր քննարկում է ՀՀ վճռաբեկ դատարանի դատավորի ընտրության հարցը։ ՀՀ բարձրագույն դատական խորհուրդը վճռաբեկ դատարանի քաղաքացիական եւ վարչական պալատի դատավորի թափուր տեղի համար առաջադրել է Սամվել Գրիգորյանի, Արմեն Հայկյանցի եւ Արսեն Մկրտչյանի թեկնածությունները։ Սյունիքի մարզի առաջին ատյանի դատարանի գործող նախագահ Սամվել Գրիգորյանն ինքնաբացարկ է հայտնել։
Ինչպես հայտարարեց ԲԴԽ նախագահ Ռուբեն Վարդազարյանը՝ զրուցել է պարոն Գրիգորյանի հետ, վերջինս պարզաբանել է․ «Հետպատերազմյան շրջանում հաշվի առնելով Սյունիքի մարզի առաջին ատյանի դատարանի ծանր վիճակը՝ այսօր կան երբեւէ անհրաժեշտ է համակարգել եւ ապահովել դատարանի բնականոն աշխատանքը, այդ իսկ պատճառով չեմ հավակնում ստանձնել վճռաբեկ դատարանի դատավորի թափուր պաշտոնը»։
ԱԺ փոխնախագահ Ալեն Սիմոնյանը հետաքրրքվեց՝ խնդիրը ո՞րն է, Սյունիքում քաղաքացիական հայցե՞րն են ավելացել։ Ռուբեն Վարդազարյանը պատասխանեց․ «Հակառակը, քրեական եւ քաղաքացիական գործերը, կարելի է ասել, նվազել են։ Սակայն դատարանի բնականոն աշխատանքի կազմակերպման համար շատ ավելի ջանքեր են պետք, եւ պարոն Գրիգորյանը, ունենալով Սյունիքում աշխատելու բազմամյա փորձ, գտնում է, որ իր ներկայությունը դատարանում շատ ավելի կարեւոր է, քան վճռաբեկ դատարանում պաշտոնավարելը։ Խոսքը տեխնիկական աշխատանքների մասին է, ընդհուպ մինչեւ ճանապարհների հետ կապված խնդիրները»։
Ալեն Սիմոնյանն արձագանքեց․ «Անկեղծ ասած չհասկացա՝ ի՞նչն է փոխվել Սյունիքի մարզում, ճանապարհնե՞րը․․․պատճառը ո՞րն է»։ Ռուբեն Վարդազարյանն ասաց․ «Ես հրապարակեցի այն, ինչ ինձ փոխանցել էր պարոն Գրիգորյանը»։
Կարդացեք նաև
Լուիզա ՍՈՒՔԻԱՍՅԱՆ
