«Ադրբեջանը կոպտորեն խախտելով միջազգային մարդասիրական իրավունքով ստանձնած պարտավորությունները, ՄԻԵԴ կիրառած միջանկյալ միջոցների պահանջները՝ թաքցնում է իր հսկողության ներքո գտնվող հայ ռազմագերիների եւ քաղաքացիական անձանց իրական թիվը եւ ձգձգում նրանց, այդ թվում՝ կանանց անհապաղ հայրենադարձման գործընթացը»,-ԱԺ ամբիոնից այսօր ընթերցելով խորհրդարանի՝ Ադրբեջանի գործողությունները դատապարտող հայտարարությունը՝ ասաց «Իմ քայլից» դուրս եկած պատգամավոր Թագուհի Թովմասյանը։
Այսօր ԱԺ-ն փակ ձեւաչափով քննարկեց «Ադրբեջանի վերահսկողության ներքո գտնվող ռազմագերիների եւ գերեվարված քաղաքացիական անձանց, այդ թվում` կանանց հայրենադարձմանը խոչընդոտելու Ադրբեջանի քաղաքականությունը դատապարտելու վերաբերյալ» ԱԺ պատգամավորներ Թագուհի Թովմասյանի, Աննա Գրիգորյանի եւ Վարդան Աթաբեկյանի հեղինակած ԱԺ հայտարարության նախագիծը, որն ընդունելու քվեարկությունը տեղի կունենա առաջիկայում։
Թագուհի Թովմասյանի փոխանցմամբ՝ հայտարարությունում շեշտվում է, որ նշյալ անձանց Ադրբեջանը փաստացի պահում է գերու կարգավիճակում եւ զրկում դատական պաշտպանության իրավունքից։ «Ադրբեջանը շինծու քրեական հետապնդման գործընթաց սկսելով՝ փորձում է իր վերահսկողության ներքո գտնվող հայ ռազմագերիներին եւ քաղաքացիական անձանց զրկել ժնեւյան կոնվենցիայով սահմանված կարգավիճակից՝ նրանց չտրամադրելով կոնվենցիայով նախատեսված իրավունքները։ ԱԺ-ն դատապարտում է Ադրբեջանի հայատյաց, թշնամանքի քաղաքականության պայմաններում հայ ռազմագերիների հայրենադարձմանը խոչընդոտելը»,-հավելեց Թագուհի Թովմասյանը։
Կարդացեք նաև
Լուիզա ՍՈՒՔԻԱՍՅԱՆ
