Հանրապետության հրապարակում հրավիրած հանրահավաքում Նիկոլ Փաշինյանն այսօր ներողություն է խնդրել Հայաստանի, Արցախի ու Սփյուռքի ժողովրդից` իր գործած սխալների համար: Այսօր, Բաղրամյան պողոտայում, «Հայրենիքի փրկության շարժման» հրավիրած հանրահավաքում, շարժման խորհրդի անդամ Իշխան Սաղաթելյանը պատասխանեց նրան. «Նիկոլ, ներողությունը շատ քիչ է, ներողությունով Հադրութն ու Շուշին հետ չենք բերելու, մեր կորցրած տղերքին հետ չես բերելու, մենք ներողությունով չենք բավարարվելու, դու պետք է հեռանաս եւ վերջ»:
Իշխան Սաղաթելյանը նաեւ ասաց, որ իրենք երթ չեն արել, որովհետեւ չպետք է տրվեն Նիկոլ Փաշինյանի սադրանքներին եւ պինդ, ամուր ու հետեւողական քայլերի արդյունքում հեռացնելու են Նիկոլ Փաշինյանին: Իշխան սաղաթելյանը նկատեց, որ Բաղրամյան պողոտայում մարդիկ գնալով ավելանում են եւ որեւէ մեկին չեն բերում համոզելով ու կաշառելով: Մարդիկ գալիս են այստեղ իրենց կամքով`գիտակցելով պետության եւ պետականության առջեւ ծառացած վտանգը. «Բաղրամյան պողոտան մեր պայքարի հրապարակն է, մեր տունն է, մեր խրամատն է, հայ ժողովրդի պայքարի հրապարակն է: Եկեք պայմանավորվենք, որ այս հրապարակը կազատենք միայն այն դեպքում, երբ այս դավաճանին կհեռացնենք: Գիշերում ենք այս հրապարակում, սա հրապարակ է, որը պետք է պինդ պահենք: Այստեղից է թելադրվում Հայաստանի քաղաքական օրակարգը: Նիկոլը գոյություն չունի եւ վերջ»:
Չորեքշաբթի օրը խորհրդարանում տեղի է ունենալու կառավարության հետ հարցուպատասխան եւ ըստ օրենքի, վարչապետը պետք է ներկայան խորհրդարան: «Այդ օրը, այդ ժամին այս հրապարակում հայտարարում ենք հանրահավաք: Այդ օրը 16. 00-ին հավաքվում ենք այստեղ»,- ասաց նա`հավելելով, որ վաղը շարունակվելու են բողոքի, անհնազանդության ակցիաները:
Ցուցարարները երթով գնացին նախագահի նստավայր եւ աջակցություն հայտնեցին նախագահի ինստիտուտին, Սահմանադրությանը: Դեպի նախագահի նստավայր երթը քիչ առաջ ավարտվեց։
Կարդացեք նաև
Նելլի ԳՐԻԳՈՐՅԱՆ
