Հայաստանը չի դիմել Ռուսաստանին երկրի ներքին իրավիճակի հարցում օգնության խնդրանքով: Այս մասին «ՌԻԱ Նովոստիի» հետ զրույցում հայտարարել է Ռուսաստանի Դաշնային խորհրդի նախագահ Վալենտինա Մատվիենկոն:
«Այն, ինչ կատարվում է Հայաստանում, Հայաստանի ներքին գործն է: Հայաստանի ղեկավարությունից, իմ գործընկերոջից (Հայաստանի ԱԺ նախագահից-խմբ.) Ռուսաստանին ուղղված որևէ խնդրանք չի եղել»,- ասել է Մատվիենկոն՝ վստահեցնելով, որ Ռուսաստանը չի միջամտում այլ երկրների ներքին գործերին:
Նա նաև նշել է, որ Ռուսաստանն անհանգստությամբ հետևում է Հայաստանում ստեղծված իրավիճակին և շահագրգռված է, որպեսզի այն շուտափույթ կարգավորվի:
«Իհարկե, մենք տագնապով հետևում ենք այդ ամենին: Եվ մենք շահագրգռված ենք, որպեսզի Հայաստանում իրավիճակը հնարավորինս արագ կայունանա: Դա կարևոր է հենց Հայաստանի, հայ ժողովրդի համար, դա, անկասկած, կարևոր է նաև տարածաշրջանում կայունության համար»,- ասել է Մատվիենկոն:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ
