«Ադրբեջանի վերահսկողության ներքո գտնվող ռազմագերիների եւ գերեվարված քաղաքացիական անձանց, այդ թվում` կանանց հայրենադարձմանը խոչընդոտելու Ադրբեջանի քաղաքականությունը դատապարտելու վերաբերյալ» ԱԺ պատգամավորներ Թագուհի Թովմասյանի, Աննա Գրիգորյանի եւ Վարդան Աթաբեկյանի հեղինակած ԱԺ հայտարարության նախագիծը մարտի 1-ին քննարկվեց ԱԺ արտաքին հարաբերությունների մշտական հանձնաժողովում:
Հարցի զգայունությունը հաշվի առնելով՝ ընդունվեց հանձնաժողովի նախագահ Ռուբեն Ռուբինյանի՝ քննարկումը փակ ընթացակարգով անցկացնելու առաջարկը:
Նշենք, որ հեղինակների գնահատմամբ՝ 2020-ի դեկտեմբերի 8-ին ՀՀ ԱԺ-ի ընդունած ուղերձից անցել է շուրջ 3 ամիս, սակայն Ադրբեջանը դեռեւս չի վերադարձրել իր վերահսկողության ներքո գտնվող գերեվարված զինվորականներին եւ քաղաքացիական անձանց, այդ թվում՝ կանանց:
Հայտարարության նախագծի հեղինակների նպատակն է խորհրդարանական երկրի թիվ մեկ մանդատ ունեցող կառույցի կողմից դատապարտել Ադրբեջանի պահվածքը: Ու նաեւ միջազգային կառույցների, միջազգային հանրության ու իրավապաշտպան կազմակերպությունների հետ համատեղ ճնշման միջոցով նպաստել Ադրբեջանի վերահսկողության ներքո գտնվող բոլոր ռազմագերիների եւ քաղաքացիական անձանց, այդ թվում՝ կանանց հայրենադարձման մարդասիրական գործընթացը կյանքի կոչելուն:
Կարդացեք նաև
Նախագծի համահեղինակ Թագուհի Թովմասյանը տեղեկացրեց, որ իրենք ընդունել են ԱԳՆ-ի առաջարկները, ներկայացրել լրամշակված տարբերակ, որին հանձնաժողովը դրական եզրակացություն տվեց:
ԱԺ
