«Լոռեցիներին, մեր հայրենակիցներին հրապարակային կոչ եմ արել մասնակցել այսօրվա հանրահավաքին, եւ սա գաղտնիք չէ։ Արմեն Հարությունյանը նաեւ մեր քաղաքական թիմի անդամ է, եւ շատ մարդիկ տարբեր հարցերով, այդ թվում՝ տեխնիկական, դիմում են նրան»,-Aravot.am-ի հետ զրույցում այսօր անդրադառնալով առցանց հարթակում այդ թվում իր խորհրդական Արմեն Հարությունյանի մասնակցությամբ ձայնագրության հրապարակմանը՝ ասաց Լոռու մարզպետ Արամ Խաչատրյանը։
Հիշեցնենք, որ երեկ տարածվեցին ՏԻՄ մարմինների պաշտոնյաների հետ հեռախոսային խոսակցության ձայնագրություններ, որոնցում պաշտոնյային զանգահարած անձը ներկայանում է իբրեւ «Քաղաքացիական պայմանագիր» կուսակցության անդամ ու հետաքրքրվում, թե վարչապետ Նիկոլ Փաշինյանի՝ մարտի մեկին հայտարարած հանրահավաքին մասնակցելու համար մարդկանց տեղափոխման խնդիր կա՞, տրանսպորտի հարց պե՞տք է լուծել։ Զրուցակիցներն էլ պատասխանում են, թե ինչ են արել այդ ուղղությամբ։ Լոռու մարզպետի խորհրդական Արմեն Հարությունյանն ասում է, որ ողջ օրը զանգերի, հանդիպումների միջոցով աշխատել են․ «Բոլոր հարցերով զբաղվում են, դպրոցներից նորմալ թիվ ա»․․․
«Այնպես որ, կարծում եմ՝ այստեղ որեւէ արտառոց որեւէ բան չկա»,-նշեց Արամ Խաչատրյանը։ Նրա խոսքով․ «Մեր կուսակցականները գալիս են իրենց մեքենաներով։ Մարդիկ կան, որ ժամ են ճշտում, տարբեր տեխնիկական հարցերով են դիմում»։
Մարզպետը վարչական ռեսուրսի օգտագործումը բացառում է․ «Նման բան գոյություն չունի։ Հիմա որեւէ մեկին որեւէ մեկը չի կարող պարտադրել։ Ավելին՝ մարդիկ կան, որոնք աշխատելով պետական ապարատում, հրապարակային քննադատություն են հնչեցնում, այսինքն՝ ազատ են իրենց խոսքի, կարծիքի եւ տեղաշարժվելու հարցում, բայց այդ ազատությունը ոմանք իհարկե շփոթում են ամենաթողության հետ։ Նման դեպքեր էլ կան»։
Կարդացեք նաև
Ինչ վերաբերում է ընդդիմախոսների հայտարարություններին, թե հանրահավաքի ժամանակ բախումների պատասխանատվությունը կրելու է իշխանությունը, Արամ Խաչատրյանը շեշտեց․ «Բախումներ չեն լինի, մենք թույլ չենք տա։ Այն, ինչ իրենք նախապես պլանավորում են, չի ստացվելու»։
Լուիզա ՍՈՒՔԻԱՍՅԱՆ
