Կառավարության վերջին նիստերից մեկի ժամանակ Նիկոլ Փաշինյանը հայտարարել է, թե մեր տնտեսությունը վերակենդանացման նշաններ է ցույց տալիս:
Ապա վկայակոչել է ՀԴՄ կտրոնների հետ կապված ինչ-որ թվեր, որպես իր ասածի վկայություն: Այն, որ երեք տարի զբաղեցնելով վարչապետի պաշտոնը, նա այդպես էլ չհասկացավ, որ ՀԴՄ կտրոնները չեն տնտեսության վիճակի ցուցիչը, արդեն զարմանալի էլ չի:
Սակայն, որ մեր տնտեսությունը իսկապես վերակենդանացման կարիք ունի, դա միանշանակ է: Դա հաստատում է վիճակագրական կոմիտեի հրապարակած 2020 թ.-ի համախառն ներքին արդյունքի (ՀՆԱ) տարեկան ցուցանիշը: Համաձայն այդ ցուցանիշի, անցած տարի Հայաստանի տնտեսությունը կտրուկ՝ 7,6 տոկոս անկում է ունեցել:
Ըստ տնտեսության ճյուղերի պատկերը հետեւյալն է: Ժամանակին խոստացված շինարարական «բումի» փոխարեն այստեղ ունենք 9,5 տոկոս անկում: Արդյունաբերությունում, որտեղ մի քանի տարի առաջ լուրջ աճ էր սկսվել, անցյալ տարին նույնպես եզափակվեց անկումով՝ 0,9 տոկոս: Առեւտրում, որտեղ ընդգրկված է առնվազն մի քանի տասնյակ հազար մարդ, անկումը կազմել է 14 տոկոս, իսկ մանրածախ առեւտրում անկման ցուցանիշն էլ ավելի մեծ է՝ 17,3 տոկոս: Այսինքն, մի կողմից նվազել են առեւտրով զբաղվողների եկամուտները, մյուս կողմից՝ առեւտուր անող բնակչության եկամուտները:
Կարդացեք նաև
Մինչդեռ, վարչապետի աթոռին գտնվող մարդը ՀԴՄ-ների կտրոնների թվերը ներկայացնում է որպես տնտեսական աշխուժության ցուցիչ: Ծառայությունների ոլորտում նույնպես լուրջ անկում ունենք՝ 14,7 տոկոս: Այս ոլորտը նախորդ երկու տարիներին հնարավորություն էր տալիս տնտեսական աճ ցույց տալ շնորհիվ բուքմեյքերական ընկերություններում խաղադրույքների կտրուկ ավելացման: Միայն գյուղատնտեսությունում աննշան՝ 1,4 տոկոս աճ է գրանցվել, այն էլ հիմնականում երեք-չորս տեսակի գյուղմթերքների բարձր բերքի շնորհիվ: Մնացած բոլոր գյուղմթերքների բերքի անկում ունենք, որի հետեւանքով այս տարի անհամեմատ թանկացել էին մրգի եւ բանջարեղենի գները:
Մանուկ ԱՐԱՄՅԱՆ
Հոդվածն ամբողջությամբ՝ «Ազգ» թերթի այս համարում
