Մի քանի օրից՝ մարտի 3-ին, գործարար համայնքը կնշի «Գործարարի օրը»: Այն Հայաստանում նշվում է 2017 թվականից սկսած, որը նպատակ ունի ընդգծելու մեր երկրի տնտեսության զարգացման գործում, ինչպես նաեւ հայ ժողովրդի կյանքում գործարարի առանձնահատուկ դերը:
Մարտի 3-ը հայ մեծ գործարար, նավթարդյունաբերող եւ բարեգործ Ալեքսանդր Մանթաշյանցի ծննդյան օրն է: Այդպիսով հարգանքի տուրք է մատուցվում իր գործերով հայ ժողովրդի հարգանքը նվաճած Ալեքսանդր Մանթաշյանցին: Բայց, ինչպես ասում են՝ խոսքն ու գործն իրար չեն բռնում: Հայտնի գործարարներ Ալեքսանդր Մանթաշյանցի եւ Միքայել Արամյանցի քանդակներն արդեն որքան ժամանակ է՝ «Հայ բարերարների ճեմուղուց» անհետացել են եւ որեւէ իրավասու մարմին չկա, որը տեղյակ կլինի թե գործարարների կիսանդրիներն ուր են:
«Հայ բարերարների ճեմուղին» գտնվում է Օղակաձեւ զբոսայգում՝ Նալբանդյան, Խանջյան եւ Իսահակյան փողոցների հատվածում, Միքայել Նալբանդյանի հուշարձանի հետնամասում։ Այնտեղ տեղադրված են նաեւ հայ բարերարի հավաքական կերպարը խորհրդանշող հուշակոթող եւ անհատ բարերարներին նվիրված հուշարձաններ։
Կարդացեք նաև
Հիմնադրվել է 2010 թվականին՝ կառավարության որոշմամբ։ Ծրագիրն իրականացրել է ՀՀ սփյուռքի նախարարությունը՝ ճեմուղու հիմնադրման եւ հուշակոթողի համար պետբյուջեից ծախսելով 21 միլիոն դրամ: Քանդակագործը Ֆերդինանդ Առաքելյան է:
«Այստող լինելու պատիվը կունենան նրանք, որոնք իրենց մահվանից հետո ժողովրդի կողմից կհիշվեն որպես մեծ բարերարներ»,-Aravot.am-ի հետ զրույցում ասում է Հայաստանի արդյունաբերողների եւ գործարաների միության նախագահի գլխավոր խորհրդական Հովսեփ Պողոսյանը, որը վերջին անգամ «Մանթաշյանցին» ու «Արամյանցին» տեսել է աշնանը. Այդ ժամանակ նրանք տեղում են եղել:
Հովսեփ Պողոսյանն ասում է, որ ամեն տարի գործարարները հավաքվում են Աբովյան փողոցում գտնվող Ալեքսանդր Մանթաշյանցի արձանի մոտ եւ այս ճեմուղին, կարծես, անուշադրության է մատնված, թեեւ այստեղ ավելի շատ են ներկայացված գործարարները:
«Շուտով կնշենք գործարարի օրը, եւ լավ կլիներ, որ որեւէ մարմին զբաղվեր այս հարցով: Անհայտ է սա վանդալի՞զմ է, թե՞ պետական որեւէ մարմին է միջամտել: Պետք է հասկանալ՝ ով է այս ամենի իրավահաջորդը, քանի որ Սփյուռքի նախարարությունը, որը սրա նախաձեռնողն էր, այլեւս գոյություն չունի, քաղաքապետարա՞նն է, թե՞ կառավարության՝ Սփյուռքի գործերով հանձնակատարը: Այս լավ գործը պետք է տեր ունենա եւ պետք է շարունակվի: Շատ հնարավոր է, որ այդ տերը լինի գործարար շրջանակներից կամ գործարարության միությունները, որոնք, հետագայում, պետության հետ կնքված պայմանագրերի հիման վրա այս ամեն ինչին ավելի խնամքով կվերաբերվեն»,-ասաց մեր զրուցակիցը:
Aravot.am-ի հարցմանն ի պատասխան, Սփյուռքի գործերի գլխավոր հանձնակատարի գրասենյակից պատասխանեցին՝ գրասենյակը պարտավորություն չունի ճեմուղու նկատմամբ: Երեւանի քաղաքապետարանից նույնպես հայտնեցին, որ տեղյակ չեն արձաններից: Ըստ քաղաքապետարանի պատասխանատուների, անցյալ տարի վարձակալը հրաժարվել է նշյալ տարածքից եւ այդտեղ կանաչապատման եւ բարեկարգման աշխատանքները կատարում է «Կանաչապատում եւ շրջակա միջավայրի պահպանություն» ՀՈԱԿ-ը: Որեւէ այլ գործառույթ ՀՈԱԿ-ն այդ ճեմուղում չունի:
Գուցե ոստիկանությո՞ւնը պարզի թե ո՞ւր են անհետացել պետական բյուջեի գումարներով ձուլված գործարարների արձանները:
Լուսինե ԲՈՒԴԱՂՅԱՆ
