«Նիկոլ Փաշինյանը երբեք ինքնակամ հրաժարական չի տալու: Նա ամեն ինչ անելու է հային հայի դեմ հանելու, քաղաքացիական բախումներ հրահրելու համար»,- «Հայելի» ակումբում այսօր հայտարարեց Նաիրա Զոհրաբյանը:
«Ի տարբերություն իր բազմաթիվ թիմակիցների, որոնք չգիտեն պատմություն, Նիկոլ Փաշինյանը շատ լավ գիտի, որ հայոց պատմության մեջ իր անունը այլեւս գրվելու է Մելիք Ֆրանգյուլի, Կարսը հանձնողի, հայ ժողովրդի պատմության բոլոր դավաճանների եւ հողատուների անվան կողքին: Հիմա իրեն պետք է հնարավորինս արագ ստանալ զոհի կերպարանք, որպեսզի կարողանա, ինչպես ասում են, իր ազգանվան վրայից ոչ թե մաքրի, այլ ինչ-որ տեղ սուբլիմացնի դավաճանության խարանը, որ իր ընտանիքի հետ տեսնեն հաշվեհարդար, որպեսզի ինքը ներկայանա զոհի կերպարանքով, հանրության մեջ առաջացնի խղճահարություն:
Նիկոլ Փաշինյանը մանիպուլյացիայի հանճար է: Բուկովսկին մի ֆանտաստիկ բանաստեղծություն ունի՝ «Ամբոխի հանճարը»: Այս մարդը մանիպուլյացիայի, դեմագոգիայի, պոպուլիզմի հանճարն է: Ես հիմա նորից դիմում եմ հանրությանը՝ չգնալ սադրանքների, չկատարել Նիկոլ Փաշինյանի ցանկությունը: Հայը հայի վրա ձեռք չպիտի բարձրացնի: Նիկոլ Փաշինյան, դու հեռանալու ես: Դու հեռանալու ես քաղաքական ճանապարհով: Դու իշխանության մնալու այլընտրանք չունես, որովհետեւ նոյեմբերի 10-ին ստորագրելով դավաճանական փաստաթուղթը, դու գործել ես քաղաքական ինքնասպանություն»,-ասաց ԱԺ ԲՀԿ խմբակցության պատգամավորը:
Աշոտ ՀԱԿՈԲՅԱՆ
