«Մենք ծրագրում էինք մարտի 16-ից սկսել, սակայն, ինչպես տեսնում եք, շաբաթը ուրբաթից շուտ եկավ մեր բանակի օգնությամբ»,- Ազգային-ժողովրդավարական բևեռի նախաձեռնող խմբի հանրահավաքի ընթացքում՝ Մատենադարանի մոտ հայտարարեց Շուշիի առանձնակի գումարտակի նախկին հրամանատար Ժիրայր Սեֆիլյանը:
Խոսելով ՀՀ Զինված ուժերի Գլխավոր շտաբի հայտարարության մասին՝ Ժիրայր Սեֆիլյանը հայտարարեց. «Երեկ կեսօրվանից՝ այն պահից, երբ մենք՝ բոլորս իմացանք, որ բանակի ղեկավարությունն անհնազանդություն է հայտնել, ես կասեի մեր երկրում սկսել է ազատ ժողովրդավարական նոր գործընթաց: Ծափահարություն մեր բանակի համար: Երբ հավասարակշռվում է ուժը ուժով, ամեն ինչ տեղն է ընկնում: Հիմա կարգին ժողովրդավարական երկրում ենք արդեն»:
Ժիրայր Սեֆիլյանը հավաստիացրեց՝ իրենք այն ուժն են, որը համախմբելու է ժողովրդի մեծամասնությանը, որոնք չեն ցանկանում տեսնել նախկիններին նորից իշխանության ղեկին հայտնի պատճառներով, նույն տրամադրվածությամբ, նույն պատճառներով այլևս չեն ուզում տեսնել նորերին ու հավելեց. «Մենք՝ որպես ուժ, հաճախ փորձել ենք այդ ճեղքումը կատարել՝ արհեստական սև-սպիտակին զուգահեռ ցույց տալ ազգային իշխանության ուժի ներկայությունը, սակայն տարբեր ձևով խոչընդոտել են»:
Կարդացեք նաև
Նա վստահեցրեց՝ հիմա մեր բանակի շնորհիվ իրենք հնարավորություն ունեն երևալու ժողովրդին:
Տաթև ՀԱՐՈՒԹՅՈՒՆՅԱՆ
Լուսանկարները՝ Ազգային ժողովրդավարական բևեռի ֆեյսբուքյան էջից
