«Նիկոլ Փաշինյանը շարունակում է ճնշումները բանակի, զինված ուժերի ղեկավարության, մասնավորաբար ԳՇ պետի նկատմամբ, որպեսզի հասնեն նրա հրաժարականին: Բայց մեր զինված ուժերի ղեկավարության տրամադրությունը շատ հստակ է. իրենք ժողովրդի կողմն են, ժողովուրդը`բանակի»,- «Հայրենիքի փրկության շարժման» այսօրվա հանրահավաքում հայտարարեց շարժման համակարգող Իշխան Սաղաթելյանը`վանկարկելով. «Մենք բանակի կողքին ենք»: Հավաքվածները բռունցքները վեր պարզած`միացան վանկարկմանը:
Բանախոսն այս իրավիճակում շատ կարեւորում է ՀՀ նախագահի դիրքորոշումը, որի սեղանին դրված է ԳՇ պետի հրաժարականը հաստատելու դիմումը: «Նախագահը հայտարարել է, որ չի ստորագրելու, բայց դա բավարար չէ: Չստորագրելու դեպքում, եռօրյա ժամկետում, ԳՇ պետը կհամարվի աշխատանքից ազատված»,-մանրամասնեց Իշխան Սաղաթելյանը`հավելելով, որ անհրաժեշտ է, որպեսզի նախագահը առարկություններ ներկայացնի եւ հարցն ուղարկի Սահմանադրական դատարան: «Այս պահին գլխավորը դա է, որպեսզի ՀՀ նախագահը չտրվի վարչապետի շանտաժներին եւ չգնա այդ քայլին, շատ հստակ ձեւակերպի իր առարկությունը եւ այն ուղարկի ՍԴ»,- ասաց նա:
Հանրահավաքի մասնակիցներն այս պահին երթով շարժվում են դեպի նախագահի նստավայր`ցուցարարների այս հորդոր-պահանջը նախագահին փոխանցելու:
Կարդացեք նաև
Նելլի ԳՐԻԳՈՐՅԱՆ
Լուսանկարը՝ արխիվային
